الأربعاء، 2 نوفمبر، 2011

البنت


تقريبا مخلوق من وسط الضى ونهر ماحدش شافه ، ممكن م الجنة وممكن من بين الأحلام ، البنت حياة لعصفور طاير وبيحضن كل الألوان فى عيونه ، تقريبا البنت ملاك حَب يجرب عيشة الانسان ماعرفش يكون بنى آدم من لحم ودم ، تقريبا كدة مخلوقة من حلم ونور ، مش عارف ليه عين البنت براح ، هتشوف فيها الشمس وقت مايبلعها البحر وتشوف فيها شعاع الشمس وهوة بيرمى ملامحه على شجرة فسفور ، وتشوف فيها ذكرى لكل تجارب حوا ، وتشوف فيها تفاصيلك وكأنك شفاف على كشكول واضح كل الرسومات منه ، وتشوف العطر وهوة بيِرْسَى على كفوف الورد ، وتشوف فيها مليون لون واضحين جدا ولا يقدر ينطق منها لسانك لون ويصدقه عقلك ، وبيتهيألى كمان انها تقدر بعنيها تودى مراكب آخر الأرض ، ولولا حكمت ربك إن الأرض بتدور كان مافضلش مراكب فى البحر ، وتقدر ترسم بعنيها مصاير ناس وبتنفخ روح على روحهم لو حبت ، تقدر برده لو حبت .. تعمل واصلة نور للقمر الساكن فى عيون الحبيبة وتفك عقوده مع الشمس وتبقى مصدر نوره ، وكمان تقدر من غير مجهود تلغى السحر والتعاويذ والأفكار اللى بتتولد جواك وتضيف براحتها أغنية لفيروز وتقدر من رمش عنيها لما تحركه فى هدوء تعمل مزيكا زى بتاعة اغنية حب ايه ،وكمان فى عنيها ... وكمان ...وتقدر ...وتقدر ...وتقدر

أنا


أنا قمة الدهشة اللى فى عيون الملايكة لما رفض إبليس السجود وقمة الدهشة برده فى عيون الشيطان لما أمر ربنا يسجدوا لآدم

أنا قمة أى شئ وكل شئ أنا الإزاز المكسر فى ميكروباص بايظ واصل مابين الدهشة والواقع أنا شنطة العيل اللى فيها ساندوتشاته أنا وقت الفسحة لعيل مخنوق م الدراسة وجرس المروح للمدرس المخنوق من التعليم وبيدور على الوقت لدروس تانية أنا حلم لسة بيتولد وحلم مولود واتفطم وحلم لسة متخرج من الجامعة وبيدور على حلمه أنا سلسلة مفاتيح فى بنلطلون واحد بيدفع قسط عربية وبيجيب نص كيلو لبن عشان يوفر للإيجار أنا صفارة الإنذار انا عربية الإسعاف اللى بتخبط وتزعج كل الشوراع وفاضية من جوا وأنا الإضاءة فى غرفة العملية لطفل لسة بيحبى قبل الموت ونعش راجل عجوز جدا مكروه من ولاده وأنا الإبن الكبير برده وأنا الإبن الصغير وأنا الجار اللى بتحسّر على الدنيا وبنزل للعزا عشان مايقلوش عيبة وأنا اللى بصلى الفجر حاضر وبدور على مزة بعد الظهر وأنا الكرسى اللى فاضى فى آخر العربية وكل اللى بيشوفه بيمشى وأنا الصدفة اللى بين اتنين كانوا زملا فى الجامعة وأنا الجامعة وقت امتحان المحاسبة وأنا الكيبوورد وقت الدردشة وأنا سطوح الجيران وقت مانطير طياراتنا وأنا لعبة الدومينو فى رحلة لشرم وقطر الليل فى رحلة الشتا لأسوان وأنا صورة على الحيطة فى دوشة الإعلان عن الترشيح وأنا الكشكول اللى فاضى ورماه الواد اللى ساب المدرسة عشان يشتغل تبّاع على عربية فى الوراق وانا دبوس فى طرحة بنت أصلا مش بتتحجب وأنا تليفون فى وقت الإمتحان فى ايد الواد اللى بيراجع وعايز يعرف حل المسألة من حد ناجح قبل منه فى المادة أنا الطبلة فى فرح وكل ما تنضرب يتبسط كل المعزومين أنا طبق الفول فى عز الصبح على طبلية العيلة اللى مالهاش عدْ انا تدوينة عن ثورة فى عز الضرب وأنا الضرب تحت الحزام فى بطولة ملاكمة فى نهائى بطولة الجامعة ويلعب فيها كل اللى مش فى الجامعة أصلا أنا الطابور اللى مابيخلصش ولا بعرف بيبدأ امتى من أصله ولا أعرف مين اللى فيه مظلوم أنا الوحيد اللى مظلوم فى التعامل أنا الصليب فى عيون المسلمين وأنا المصحف فى عيون النصارى وأنا المصحف والصليب فى قلب مظاهرة بتطالب بنور إضافى من عيون الشمس وأنا قوضة وصالة فى حضن القمر بإيجار جديدأنا ...أنا...أنا ...