السبت، 10 يوليو، 2010

الوليد


والله ماسبتش مكانى يوم أُحد
ومازلت واقف منتظر
رغم إنى محتاج للغنايم
لكن حلاوة الإنتظار
بتهد جوايا إشتياقى للوصول
الرسول كان له أكيد حكمة فى ثباتنا
إثبتوا

***

_ الإلتزام سر الوصول بالمعركة لبر الأمان
الغنايم مصيدة
الإنتصار مش بالسهولة المفرطة
الإنتصار بتْدَعَّمه أبسط مبادئ
إيه لزمة التخطيط .. إذا كان إلتزامنا بالقواعد والأوامر إتنسى ؟؟ _

***

أنا ملتزم
وانحرافى عن مبادئى مستحيل
أنا مش هكون زى اللى نزلوا للميدان من غير سلاح
فاتحين صدورهم لاغتيال الريح من غير حساب الممكنات

***

فكروا قبل التحرك ..
هل من الممكن لجيش
أرسى قواعد الانكسار
والرهبة والخوف والعذاب جوا قلوبنا
إنه يسمح إنِّنا نملك زمام المعركة
والسيطرة ف قلب الميدان
من غير مقاومة أو مؤامرة أو معارضة
أو مخطط للحصار لاستعادة مجدهم ؟؟
إنهم لا يؤمنون
والحرب خدعة وكل شئ فيها مباح


***


والوليد مش سهل أبدا
الوليد عارف ظروفنا واحتياجنا
وانحرافه عن حالاتنا واعتقادنا
يدَعَّمه لاقتناص آخر فتات حلم المواجهه من قلوبنا
تتنزف منَّا الإرادة
ننكشف ليهم
فنستقبل سهام الفكر من جوفهم نبقى ف تشتت
هى دى لحظة وصول حلم الوليد للسما
يلتقى بخوفنا المعشش فى العيون
نستقبل المطر التحكم
يتولد فينا انكسارنا وبين ملامحنا الذهول
تنطق قلوبنا
ياريتنا طاوعنا الرسول

***

_ إيه راح يفيد الندم من بعد تحديد المصير
إيه راح يفيد المؤمنين دلوقت
بإسلام الوليد بعدين
إيه راح يفيد الإبتكار لحظة وقوع المشكلة
إذا كان إيمانَّا بدورنا أصبح منتهى
والإعتماد ع الغير أصبح وسيلة للخلاص _

***

الوليد رش الجنود ع الميدان
فى الحلم / جوا الكيان / فى الدم
إنكسر فينا التحرر
وارتمينا ف حضن أخطائنا وطمعنا
إتجردت أفكارنا من درع المصابرة والإيمان بالإنتصار
الوليد رش الجنود فى الميدان دوامات
إتخلقنا من موج المفاجأة
وانكسار الموج فى قلب الدوامات هى حقيقة الموت
إحنا اتخلقنا لمعركة واحنا مش عارفين
جلل سؤالى فى الفضا إزاى بقينا مؤمنين

_ أنا مش هفارق موقعى إلا بموتى _

ياللى عندك أمل إن الوليد يرحم شقانا وضعفنا
لازم تفوق
الوليد مش هيبقى ف صفنا أبدا
مش هيؤمن باللى فى قلوبنا
الوليد هيموت كدة
كافر

هناك 21 تعليقًا:

  1. ياللى عندك أمل إن الوليد يرحم شقانا وضعفنا
    لازم تفوق
    الوليد مش هيبقى ف صفنا أبدا


    ولو اني مش بحب اليأس
    لكن للأسف دي الحقيقه

    ردحذف
  2. الوليد مات مؤمن يا راجل :)

    عموما الرمزيه قويه مع اني لا احبذ رمزيه الاعدو بالوليد ابدااااا

    لكن الكلمات جميله

    تحياتي

    ردحذف
  3. تدرج جميل من البداية للنهاية
    بروعة قلم عارف إذاي تتولد الكلمة
    من الحروف ببراعة
    التشبيهات قوية
    تحيتي وتقديري

    ردحذف
  4. لورنس العرب :

    مرحبا بيك فى المدونة واتمنى تكرار الزيارة والتواصل

    فعلا دى حقيقة واضحة

    ردحذف
  5. فتاة من الصعيد :

    صديقتى العزيزة التشبيه كان فى وقت معين من الفترة الزمنية وفى معركة محددة الفرق ان ده امن بالله وده مش هيؤمن بأفكارنا

    تحياتى ليكى

    ردحذف
  6. hana

    مرحبا بيكى وشكرا جدا على كلامك ورأيك

    واتمنى التواصل دايما


    مع تحياتى وتقديرى

    ردحذف
  7. عارف المشكلة فين

    أن أفكارنا هتفضل رهن التنفيذ العمر كلة
    وهتعفن فى عقول ؟؟؟؟

    لو يحاول كل واحد يصنع لنفسة طريق تبقى الحياة ليها
    معنى نسبيا

    تحياتى لك

    دعوة للتواصل كاتب مصرى

    ردحذف
  8. السلام عليكم
    القصيدة جميلة جدا
    التضفير مابين الماضى والحاضر عجبنى جدا
    اتمنى مزيد من الابداع
    تحياتى

    ردحذف
  9. انت ليك ديوان مطبوع؟

    صح؟

    ردحذف
  10. علاء المصرى :


    شكرا على رأيك يا علاء ..بس عمر الافكار ماهتعفن

    ولن يضيع حق وراءه مطالب

    والتصحيح لأى شئ يبدأ من الشخص نفسه

    عشان كدة لازم نغير نفسنا الاول

    ردحذف
  11. سارح فى ملكوته:

    اهلا بيكى وحمدالله ع السلامة

    المدونة نورت بقالك كتير مش بتيجى

    شكرا لرأيك

    ردحذف
  12. حلم بيعافر :

    ايون ليا ديوان مطبوع اسمه ( فى الجامعة )


    والتانى ان شاء الله نازل قريب اسمه ( بحب الحكومة )


    واى خدمة

    ردحذف
  13. جمييييييييلة جداااا
    تسلم

    ردحذف
  14. sun of free dom


    شكرا جدا لرأيك

    ومرحبا بيكى فى المدونة


    واتمنى ان يدوم التواصل

    ردحذف
  15. رمضان كريم

    وكل عام وانتم بخير :)

    ردحذف
  16. كل سنه وإنت طيب وبخير .... ومعذره لعدم متابعتي لمدونتك في رمضان :)

    عيد سعيد :)

    ردحذف
  17. http://www.facebook.com/home.php?#!/home.php?sk=group_173862402625724

    ردحذف

  18. شاعرنا الفاضل
    كيف حالك؟
    هذه القصيدة من أروع ما قرأت في شعر الشباب

    دمتم سالماً

    ردحذف
  19. كلمات جميلة وقويه حلو الربط اللي عملته مع الأحتفاظ بالفرق طبعآ

    ردحذف