السبت، 5 ديسمبر، 2009

موقف !!




وحدي ..
مستني الناس تيجي
والناس ما تجيش
آسف .
أقصد ..
وحدك !!
مستني الناس تيجي.
والناس ما تجيش
والقلق الساكن جوا عنيك
بيخبي عليك الصورة
أنا أقرب واحد ليهم
لكن هُمَّه
مش أقرب حد إليك
فتخاف جواك
معقول ؟!!!
فتقرر تفضل وحدك
وتلم دموعك على نفسك
تدفنها فـ قلبي .
تضحك ..
للناس الجاية لغيرك
والناس الجاية لغيرك ...
ميَّتة من كتر الضحك عليك
الصبر
الناس جاية
اخواتك وأصحابك وحبايبي
كل الناس
الصبر
أوعاك تقلق
تتفاجئ إن ما حدش جايْ
تفضل تستقبل فـ رسايل
آسف
آسف
آسف
تضطر تشغل عقلك
تتخيل
إن الناس الجاية لغيرك
جايالك
تضحك على نفسك
وتعاتب نفسك
وتشخبط على كل قصايدك
فأموت !!!

(من ديوانى صلاة الصبر)
( الصورة لإيمان المالكى )

هناك 11 تعليقًا:

  1. تضطر تشغل عقلك
    تتخيل
    إن الناس الجاية لغيرك
    جايالك
    تضحك على نفسك

    الله بجد روعة عارف حاسة بسررررررررر فيها حسيتها بس احساسى بيها كان احساس داخلى ممزوج بغموض لا اعرف ماهيته
    اتمنى التعرف على المزيد من ديوانك صلاة الصبر
    ما اجمل اسم ديوانك !
    صلاة الصبر
    بيعجبنى غموضك جداااااااااااااا فيك سحر معين
    الى الامام دائما ياصديقى ربنا يوفقك

    ردحذف
  2. مى

    اشكرك جدا جدا على رأيك
    فعلا الموضوع فيه سررررررررررررررررر
    بالنسبة لديوانى صلاة الصبر ده كله بيدور حول الصبر بأكثر من طريقة لأكثر من موقف وسوف تكون النصوص القادمة فى المدونة من هذا الديوان بإذن الله

    ( بيعجبنى غموضك جداااااااااااااا فيك سحر معين )
    هههههههههههه
    وده حلو يعنى ولا وحش

    ردحذف
  3. ههههههههههههههه
    لالالالا حلو متقلقش
    هنستنى القادم بقىىىىىىىىىىىى

    ردحذف
  4. جميله اوي .... فعلا الوحده احساس قاتل .... بالذات لما تكون مستني

    تحياتي

    ردحذف
  5. حلوة اوي يا هاني الكلمات
    والصورة كمان معبرة اوي

    تحياتي

    ردحذف
  6. المساحة اللى انت بتكتب فيها وعنها مهمة جدا
    ومتمكن و شاعر متميز

    ستمر بامتاعنا بجديدك

    تحياتى

    ردحذف
  7. رووووووعة بجد

    الصراحة بتحل كل شىء وبتوفر علينا وقت كان هيضيع مننا

    ليه نستنى حد مش جاى لنا ونقول يمكن يكون لينا

    يمكن الامل

    مرة تانية بجد حلوة اوووى

    ردحذف
  8. فتاه من الصعيد
    اول قصيدة ماتكونيش اول تعليق لكن دايما ببقى مستنى رأيك

    زهور الامل
    ربنا يخليكى الصورة عليها خلاف هى بتاعة مين


    حلم بيعافر

    انت صديق رائع رغم تقصيرى مع كل الناس
    الا ان انتم لسة متابعينى وده فى حد ذاته جميل مش ممكن انساه بجد
    شكرا ليكم بجد

    ردحذف
  9. Somaya Kamal El Din

    مرحبا بيكى فى اول زيارة
    واتمنى ماتكونش اخر زيارة
    وشكرا جدا لرأيك

    ردحذف
  10. كلماتك ماتزال تستتر بالرقه وتتزين كماهى دوما بالبراءه والنقاء
    الاحساس فى طيات الكلمات عالى..وهل ترى يا سيدى مازلنا نعرف معنى الانتظار ام ان الحياه قد علمتنا الا ننتظر شيئا؟

    ردحذف
  11. واحدة من الناس
    صديقتى الغالية نحن حتى الان لم نعرف معنى الانتظار
    وغالبا ما يكون الحكم متسرع على الاشياء ولكن الحياة علمتنا بالفعل من خلال التجارب انه ليس هناك ما يسمى بالانتظار ويجب على الشخص تحريك الافكار لتناسب الموقف

    ردحذف