السبت، 21 نوفمبر، 2009

ومابين الاحمر والاسود





وما بين الأحمر والأسود
قلب الغلبان .
والنسر اللابد على قوته
أصبح تعبان
بيحاوط حلمه وأفكاره
وبيرمي همومه على النسيان !!


وما بين الأحمر والأسود
كان حلمي زمان ..
أيام مدرستي
والنجمة الحمرا فـ كراستي
إني أبقي أديب
أو حتى أكون ...
وسط اصحابي
وأنا بلعب وياهم بالدوم
يتقال لعيب
مش عارف ليه ؟!
كل ما بكبر..
أحلامي تخيب ؟!!


كان ياما كان
كان عندي أحلام بالهبل
كان أصغر الأحلام ما بينهم
أعلى من قمة علم
كان ياما كان
كام حلم مات ….
من غير كفن ؟
كام حلم مات عافية ؟
كام حلم مات م الخوف
وجنب أصحابه إندفن ؟


كان ياما كان
كان في زمان إنسان غبي
كان فاكر إنه عشان بيستحمل عذاب
يبقى نبي !!
كان ياما كان
كان في زمان إنسان ذكي
باع المبادئ قال نعم
خلوه نبي !!!

هناك 13 تعليقًا:

  1. من غير كفن ؟
    كام حلم مات عافية ؟
    كام حلم مات م الخوف
    وجنب أصحابه إندفن ؟


    كلام مؤلم جدا ..... ولكنه معبر اوي

    تحياتي

    ردحذف
  2. انت فيييييييييييييين من زمااااااان؟

    ردحذف
  3. كان فى زمان انسان ذكى
    باع المبادىء قال نعم
    خلوه نبى
    بعيدا عن تلك الاحداث التى تمر فتستهجن معها الالوان وتستبيح كل خواطرنا السيئه
    بعيدا عن مشاحنات اللعب التى صارت مغموسه بدماء مصريين عزل
    بعيدا عن فرش الالوان التى مازال علم بلدى مطبوعا فوقها
    بعيدا عنك
    وبعيدا عنى
    الكلمات سيدى تنطق بأكثر ممانريدها ان تخبر عنه
    تنطق بلساننا فنفهمها نحن اللذين نعرف جيدا لغتها
    كم من الانبياء اذن على ارضنا؟
    كم ممن استباحوا الكذب وباعو المبادىء؟
    كم سيدى؟
    هل تعرف عددهم
    انهم اكثر ممن ذكر اسمهم ف التوراة والانجيل والقراآن
    انبياء بلا رساله
    كلماتك تعرفهم جيدا
    كما اعرفهم انا ويعرفهم سوانا
    كلماتك كعادتها تخبرنى الكثير
    لذلك رغما عنى استمتع بها

    ردحذف
  4. كان ياما كانكان في زمان إنسان غبيكان فاكر إنه عشان بيستحمل عذابيبقى نبي !!كان ياما كان كان في زمان إنسان ذكي باع المبادئ قال نعم خلوه نبي !!!
    شديييييييييييييييدة اوى وواقعى جدااااااااااااااااااااااااا

    ردحذف
  5. السلام عليكم

    تسلم ايدك يا رايق
    انا حسيت كلامك وفهمته اوى
    بس احنا لسه بخير انشاء الله وفى أمل طول ما احنا لسه موجودين على ارض البسيطه
    يا ريت تقبل ودى واحترامى :)

    ردحذف
  6. قصيدة جميلة يا هاني

    بتعبر عن حالنا المنيل بنيلة
    وعن البهدلة اللي احنا عايشينها
    ربنا يسترها

    تحياتي

    ردحذف
  7. فتاه من الصعيد
    انتى كل مرة بتبقى اول تعليق انا خلاص اتعودت على كدة وهزعل قوى لو لقيتك تانى تعليق بعد كدة بجد اشكرك على اهتمامك واتمنى اكون عند حسن ظنك

    ردحذف
  8. حلم بيعافر
    انا موجود بس مشغول جدا جدا
    وشكرا على سؤالك ومتابعتك

    ردحذف
  9. مي
    شكرا لرأيك يا ميويتى
    ايه اخبار الحب معاكى ؟!!!!!!!!!!!!!




    اقدم عاصمه فى الحب

    رأيك يهمنى جدا وطبعا متقبل ودك واحترامك وتقبل انت تحياتى ليك



    زهور الامل

    شكرا ليكى جدا على متابعتك واهتمامك

    ردحذف
  10. واحدة من الناس

    جمايلك كترت عليا ومش عارف اقولك ايه

    بس انتى وحشانى قوى

    ردحذف
  11. كل سنة وانت طيب عيد سعيد

    ردحذف
  12. بجد مش لاقية تعليق
    بسم الله ما شاء الله....موهبة متميزة جدا و صدق مش طبيعى فى التعبير عن المشاعر
    لك كل التقدير و الاحترام

    ردحذف
  13. مى
    وانتى طيبة


    dina
    ربنا يخليكى وتقديرى ليكى

    ردحذف