السبت، 7 نوفمبر، 2009

للتأريخ ( انا ومصطفى الجزار واشرف توفيق وعلى سعد وياسر الليثى واحمد معبد )

يوم الاربع اللى فات اتصل بيا صديقى واخويا وصاحبى (على سعد ) وقالى ان فيه ندوة فى نادى الجزيرة وهيستضيفنى فيها انا وصديقى اللى بحبه ( اشرف توفيق ) وصديقى اللى بحترمه جدا ( مصطفى الجزار ) وهنقول فيها شعر المهم كان قايلى تعالى نصلى مع بعض كلنا عند النادى عشان الندوة بعد الصلاة مباشرة ..انا بقى راحت عليا نومة وصحيت متأخر وصليت عندنا فى امبابة ولبست بسرعة ونزلت ركبت عربية نص نقل اسمها عربية ( بصراوى ) _ دى المنطقة اللى انا ساكن فيها ولما بخرج منها بحس انى اتولدت من جديد عشان كدة دايما بحس انى مخلوق جديد فى كل مرة _ وبعدين ركبت عربية تحريرولقيت انى هتأخر قوى فنزلت خدت تاكسى لغاية النادى ورحت هناك دخلت على المكتبة لانى عارف ان الندوات تقام فى المكتبة وانا تم استضافتى فى نفس المكان من حوالى سنتين مع ( على سعد ) وكان معايا( اشرف توفيق) المهم لقيت المكتبة مقفولة فإتصلت بعلى الموبايل كان غير متاح فإتصلت بأشرف توفيق وقالى انهم لسة مابدأوش وانهم فى النادى الاجتماعى وانا مش عارف فين فلقيت بنت حلوة قوى بتقولى بدون سابق سؤال انا رايحة هناك ممكن دقيقة واحدة هدخل الورق واجى اوصلك ..بصراحة احرجت جامد قوى وعلى سعد كان قالى تعالى عند الباب الرئيسى وانا هستناك ..قررت انى اسيب البنت واروح لعلى _ لانى هتكسف امشى معاها _ رحت لعلى ورحنا النادى الاجتماعى وكان الناس قاعدين برة ( اشرف ومصطفى ) سلمت عليهم وقعدنا مع بعض كان الكلام منقسم الى قسمين فى اغلب الوقت ( انا وعلى ) اشرف ومصطفى )
واحنا قاعدين لقينا ( ياسر الليثى) جه ومعاه واحدة زميلته ..ياسر عضو فى النادى اصلا وشاعر كويس وصديق جميل جدا وياما كنت ببقى فى بيته دايما مساءا نجتمع عشان نسمع بعض مع باقى الاصدقاء اللى كانوا بيعملوا حاجات تانية فى القاعدة _مش لازم اقولها _ المهم اتكلمنا جميعا على الفيس بوك والمواقع والفيديوهات بتاعة مصر والجزائر وجيبنا سيرة شوية شعراء وشوية ممثلين مع شوية ذكريات بسيطة ومواقف بسيطة ..وبعدين دخلنا الندوة كان الحضور كويس لكن مش جمهور شعر _ احنا اللى خليناهم جمهور شعر _ كانت القاعدة على المنصة من اول دخولك من الباب ( العبد لله _ مصطفى الجزار_ على سعد _ اشرف توفيق_ياسر الليثى ) وبدأنا اللقاء وكان الجزار اول واحد ثم على سعد ثم اشرف ثم أنا ثم ياسر ثم استمعنا الى مجموعة من المواهب الصغيرة وإتدبسنا وعرفنا ان فيه جوايز للناس دى والمفروض ان احنا لجنة التحكيم برده ( المهم الموضوع ده اتقضى ) ورجعنا تانى لنفس الكرة فى الشعر وكان قدامنا زجاجات مياه وكوبيات وورد وحاجة ساقعة ..ولينا صديق اسمه( احمد معبد ) حضر متأخر شوية وأخد الحاجة الساقعة من قدام مصطفى الجزار ( كانت برتقال واحمد مش بيشرب غير الصنف ده ) وبعد ما خلصنا الندوة على الساعة 4 وشوية قعدنا تانى مع بعض فى النادى وبعدين قررنا نروح ناكل مع بعض بعد ان انهالت الوعود بالعزومات من كل واحد شوية المهم ياسر انسحب لانه عنده محاضرة فى الجامعة ..خرجنا وركبنا تاكسى بتاع احمد معبد وروحنا المهندسين عند ( اسماك وادى النيل ) طلبنا وجبات جامدة جدا ( مصطفى الجزار دايما بيطلب دليفرى من المطعم ده ) واحمد معبد دايما بييجى ياكل فى المطعم ..المهم طلبنا كل واحد وجبة ( كانت الوجبة عبارة عن طاجن مشكل من كل انواع المأكولات البحرية ورز بالخلطة وكان عليه جمبرى وسبيط وطبعا السلطة _ طحينه وطماطم_ وعيش ) بالنسبة للسعر مش بحب اجيب سيرة الفلوس عشان الحسد ..وبعد ما خلصنا كان كل واحد بيدور هيروح ازاى ..وانا كان بالنسبالى قريب من بيتى فانسحبت وهمه ركبوا التاكسى مع احمد عشان يوصلهم لأقرب محطة مترو .
اليوم كان جميل جدا جدا عايز اقولكم انى كنت مبسوط قوى لكن كنت بفكر فى البنت اللى شاغلانى وكنت بتمنى انها تكون معايا وفكرت انى اعزمها فى نفس المكان .
اتكلمت انا واشرف على المدونات بتاعتنا وعرفت انه متابع المدونة بتاعتى دايما ( وماسألتش ليه مش بيعلق ) وهوه بقاله كتير قوى مانزلش حاجة جديدة على مدونته .
اتكلمت انا وعلى سعد على انه هيروح يخرج لكلية الشرطه وانى هكون المخرج المنفذ معاه وان اشرف توفيق هوه اللى كاتب المسرحية واغانيها .
اتكلمت انا ومصطفى على القصايد اللى انا قولتها لانها عجبته ..واتكلمت معاه عن انى هبعتله ديوانى الجديد ( بحب الحكومة ) اول ما أخلصه عشان ما أكررش غلطة ديوان ( فى الجامعة ) وأديته نسخة من ديوانى لان النسخة ما وصلتهوش
احمد معبد حكينا عن حياته الشخصية وخطوبته وشوية حاجات تانية .
عايز اقولكم ان كان فى نادى ادب اسمه ياسمينا وكان على سعد هوه اللى بيدير الندوة قبل ما انضم ليه فى الادارة وكان بيستضيف مصطفى الجزار واشرف توفيق والكلام ده من سنين كتيرة.
اخر مرة شوفت فيها على سعد فى يوم انتخابات نادى ادب المنيرة وانتهت بإنى اكون عضو مجلس ادارة بالتزكية .
اخر لقاءات جمعت بينى وبين اشرف فى حفلة توقيع ديوانى ( فى الجامعة ) وحفل توقيع كتابه ( مبسوطة يامصر )
اخر مرة شوفت احمد معبد وياسر الليثى كان على القهوة فى امبابة ( اللى الناس بتتجمع فيها كل يوم خميس )
اخر مرة شوفت مصطفى الجزار مش فاكر بصراحة لكن فاكر ان نفس التجمع ده ( انا وعلى ومصطفى وكان معانا احمد سعيد ) كنا نزلنا مع بعض معرض الكتاب ..ونفس التجمع تقريبا كنا بناكل عند على سعد محشى شبت .

هناك 10 تعليقات:

  1. طب لازمته ايه بس الكلام عن الطاجن المشكل ده ؟جوعتنى ياخى
    انا نفسى احضر اى تجمع مدونين وكل مرة بقول هحضر
    زى اخر تجمع فى المنصورة
    وفى اللحظات الاخيرة تحصل حاجة
    تحياتى

    ردحذف
  2. هنيالك ياعم
    اكل
    وبنوته لاحسه مخك
    وشعر بوبتاع
    مش قر ولا حسد
    دول بس حبة حقد طبقى صعيدى اصلى
    ههههههههههههههه
    ازيك يا هنو
    واحشنى فعلا ووحشنى كلامك ورغيك اللذيذ ده
    اولا انا فعلا حقدت عليك شويه
    سيرة نوادى الادب عندكم تفتح النفس
    وتحس ان الكتابه ف بلدكم حاجه ممتعه على عكس الكتابه فى بلدى
    عامله زى ماتكون عندنا رفاهيات
    انا اولا عاوزه نسخه من ديوانك السابق
    ثانيا اكيد عايزه نسخة من ديوان بحب الحكومه
    ثالثا
    انا عايزه اجى معاك انت والبنوته اللى ف دماغك دى
    ههههههههههههههههه
    رزالة صعايده
    هههههههههههههه
    رابعا
    نفسى بجد الاقى ف بلدى اى اهتمام بينا ككتاب قصه..عارف يا هانى انا الشخص الوحيد اللى بيربطنى بنادى الادب هو استاذى ومدير نادى الادب..دايما زعلان لانى مش واخده فرصتى وحاول كتير الشهرين اللى فاتوا انه يخلينى ادخل مسابقة قصه قصيره وانا رفضت لان المجموعه مش كامله
    نفسى بجد اعمل مجموعه قصصيه باسمى
    باسم نوره احمد
    وعارف انت الحلم ده واحد من سبعة احلام نفسى احققها قبل ما اموت
    ادعيلى احققها
    المهم بقا
    استنى الديوان ولا مش فاضيلى
    ؛)
    على فكره انا بزورك اهو وافتكر كده انت اخر مره زورت مدونتى كانت امتا؟
    طبعا مش فاكر
    متشكرين ياعم

    ردحذف
  3. على فكره انا حاولت اضيفك ع الفيس بوك بس الظاهر انك رفضت الاضافه
    بردو متشكرين

    ردحذف
  4. السلام عليكم
    ماشية معاك بالورب اهو يا عم علشان متبقاش تشتكى
    سلام

    ردحذف
  5. حلم بيعافر

    تحياتى ليك وشكرا على المتابعة الدائمة بجد انا سعيد جدا بمرورك وأرائك



    واحده من الناس
    انا تحت امرك فى كل حاجة قولتيها ..انا هحجزلك نسخة من الديوان القديم..والجديد
    ومعلش انا مش بسجل بنات ماعرفهاش على الفيس وسجلتك خلاص

    بالنسبة للطباعة ..انا ممكن اساعدك فى طباعة مجموعتك عند نفس دار النشر اللى انا متفق معاها
    بالنسبة للزيارة للمدونات
    انا فعلا مقصر مع ناس كتيرة جدا وماحدش هيستحملنى غيركوا ( ربنا يخليكوا ليا
    بالنسبة لحضور الندوات واجتماعات المدونين لو نزلتى القاهرة هكون تحت امرك 24 ساعة فى حاجة تحتاجيها

    ردحذف
  6. سارح فى ملكوته

    انا مش فاهم حاجة ..انتى ليه على طول عندك فى اسلوبك لف ودوران ؟؟؟

    ردحذف
  7. يا بختك بأصداقائك يا هاني

    بحب قصصك اوي على فكرة

    وبعدين انا عايزة نسخة من ديوان بحب الحكومة
    هو انا ماليش نفس ولا ايه

    تحياتي

    ردحذف
  8. زهور الامل ادعيلى انى اطلعه وهجيبلك نسخة لغاية البيت

    ردحذف
  9. ههههههههههههههههههههههههههههههه لا بجد خطييييييييييير والنعمة ماليش دعوة انا هاجى معاكوا ههههههههههههههاولا انا بحب لا مش الحكومة لالالا بحب تفصيلك فى السرد ةفعدت اضحك على الحاجة الساقعة اللى بالبرتقال ههههههههههههههه انت ياعبده مش ممكن ه انا كمان بحبها ماعلينا
    الاكل شكله كان لذيذ بس مش هنحسد قول بس اصل ده بس اللى كان ناقص
    احلى حاجة فيك صريح يابخت مراتك بيك مش هتعرف تقررك انت هتقر لوحدك ههههههههههه
    بجد جميلة اوى لقاءتكوا بحس فيها صحوبية جامدة زى الاخوات والحمد لله انك اتبسطت وربنا يبسطك كمان وكمان وش بيغمز هههههههههه
    ونشوفك قريب فى اسكندرية فى لقاء بس يكون معاك الديوان يا استاذنا

    ردحذف
  10. بتتحجج ليه انى معطله النشر؟
    كل يوم اجى كده وما الاقيش حاجه جديده
    بردو ده كلام يا شاعر؟
    طيب انا مضربه عن القراءه ليك
    :(

    ردحذف