الاثنين، 2 نوفمبر، 2009

واحد فينا


لما الشمس تصحي عيونك
تفتح قلبك
وتصبح ع الحجة ووالدك
تغسل وشك ...
الميه تقطع وتغشك
تخرج من بيتك متدايق ...
تلعن نفسك
عربية وخربانة تشيلك
وتحطك
وتكسر جسمك!!
وطابورك للعيش بيهدك
موهبتك مدفونة فـ حلقك
حقك ضايع وبتستحمل
وبتتبهدل
طالع عينك إنت وأهلك
تعرف إنك ...
واحد فينا

هناك 7 تعليقات:

  1. عندك حق والله

    تحياتي لقلمك

    ردحذف
  2. السلام عليكم
    ماشى يا سيدى واحد فينا هو احنا كام بس علشان اكون واخد بالى
    النص حلو
    بس لاول مرة احس ان الحالة كاملة ولكنها مش متكاملة بص لو فاهم خير وبركة ولو مفهمتش مش مشكلة انا مبعرفش افهم الناس
    تحياتى

    ردحذف
  3. ههههههههههههههه
    ليه يابني بتفكرنا باللي احنا فيه

    ما تخلينا ناسيين وساكتيين
    بس تعرف

    انت عرفت بجد توصف حال الشارع المصري والمصريين المطحونين صح

    تحياتي

    ردحذف
  4. سلامو عليكو
    ازيك يا استاذ
    مش جديد عليك البساطة والجمال ده
    تحياتى

    ردحذف
  5. هانى
    انت اول مدونه افتحها من وقت طويل
    حتى تقريبا مدونتى..اتاخرت كتير عليك بس اتاخرت حاجات كتير عليا واخرتنى عنك
    لانى واحده منكم
    واحده من الناس
    بنت بسيطه عاشت تحلم ليها ولغيرها
    وكل ماتحلم حلم يموت
    تبكى شويه وتخلق حلم جديد جواها
    يارب يعيش
    وبردو يموت
    ترجع تصرخ من غير صوت
    يمكن يوم احلامنا تعيش
    حلمى الاكبر ف رغيف عيش
    يرضى ضمير ايد الخباز
    واكله لذيذه ف علبه ازاز
    تديك طاقه
    تفرح جدا لما تلاقى
    صورتك طاله جوه بطاقه
    وعليها كلمة انك مصرى
    قوللى ازاى يا صاحبى انا هفرح
    لما الاقى حاجات حواليا ف قلبى بتجرح
    افرح ليه لو اقول مصريه؟
    او صعيديه
    او سوهاجيه
    افخر ليه ان انا مصريه
    وكل الاحلام هنا بتموت
    حتى الثوره ف قلبك ماتت
    واخر صوتها كله سكوت
    تحلم تبقا ف زمنك حاجه
    كلامكة يوصل زى خواجه
    كله لاتينى مش مفهوم
    اخرك بتشيل اى هموم
    من غير صوت
    بكره تموت
    ويبكوا عليك من غير صوت
    انت هتفضل كده ولا حاجه
    اه لو اقولك ع اللى فيا
    كنت هتبكى عليك وعليا
    بس يا صاحبى معادشى يفيد
    كله ف زمنك من غير صوت

    ردحذف
  6. السلام عليكم

    الله ينور يا رايق
    والله يا عم انت احسن من غيرك بكتير
    على الاقل بتعرف تعبر وتقول انا بيا كذا وكذا
    بوحك لمشاعرك تجاه بلدك صادق ولكن ....
    .
    تحياتى لك ولقلمك
    ليتك تقبل ودى واحترامى :)

    ردحذف
  7. فتاه من الصعيد
    منورة دايما ودايما بتكونى اول تعليق وده بيسعدنى

    سارح فى ملكوته
    مش فاهم حاجة لما نتقابل تشرحيلى


    زهور الامل
    الله يخليكى انتى منورانى دايما ورأيك مهم بالنسبالى قوى

    حلم بيعافر
    نورت وشرفت انت حد بحترم رأيه جدا


    واحده من الناس

    رغم انى زعلان منك عشان بقالك كتير مش بتيجى
    لكن المسامح كريم بعد الكلام الحلو اللى قولتيه
    وياريت تيجى تعلقى عندى بسرعة عشان ببقى عايز انزل بوست جديد وبأخره بسببك ( وحشانى )

    اقدم عاصمه فى الحب
    شكرا ليك وانا متقبل تحياتك لكن ...( ايه )

    ردحذف