الأربعاء، 21 أكتوبر، 2009

دفعت انت كام ؟؟!!!




دفعت أنت كام ؟
عشان الحواري توافق تصاحبك
وترضي بصراحتك
وترضي بغبائك وترضي بجاحتك
وتصفي لجنابك ..
في لحظة مرورك تسد الحفر
تصلح مجاري
تداري عيوبها
تسفلت طروقها تهدًي الزحام
دفعت أنت كام ؟!
دفعت أنت كام ...
عشان المواصلة تجيلك لبابك
وكل الكراسي بتفضي لجنابك
دفعت أنت كام..
عشان الرغيف يجيلك سليم
ما فيهش النشارة وشكله العقيم !!!
دفعت أنت كام ...
عشان الكمين ...
يسيبك تعدي و"مزة" معاك
ولما يلاقي بطاقتك سليمة
يبوس فوق دماغك ...
وينسي قفاك !!
دفعت أنت كام ....
عشان الفطار
راجع حسابك دفعت الجنيه ؟!
فولك وعيشك وحبة خضار
سيجارة ببريزة ...
عشان العفار
لو أنت سعادتك دفعت الجنيه ؟!
فغيرك يا شاطر ...
بعملة سيادك يفتح عنيه!!!
وورقة بمية عشان اللي زيك
يصبح عليه
وورقة بمية عشان واحدة وطت ....
وباست إيديه
وورقة بمية عشان البطاطس تغير نظامها ....
وتبقي بانيه
وورقة بمية سيجاره يولع
وأنت يا حسرة
سنانك تخلع وعينك تدمع
وماكينة لصوتك عشان الشكاوي ...
يدوبك تسمع ؟!!
ما فيش شئ قبالك ...
غير أنك تفلسع !!
وتهرب بجلدك !!
وقبل أما تيجي تطالب بحقك !!
إسال في نفسك ...
دفعت إنت كام ؟؟

هناك 15 تعليقًا:

  1. عندك حق ..... لازم ندفع

    واللي ماعهوش ..... يعيش حرفوش

    تحياتي لكلماتك

    ردحذف
  2. راجع حسابك دفعت الجنيه ؟!فولك وعيشك وحبة خضارسيجارة ببريزة ...عشان العفارلو أنت سعادتك دفعت الجنيه ؟!فغيرك يا شاطر ...بعملة سيادك يفتح عنيه!!!وورقة بمية عشان اللي زيك

    ايييييييييييييييه الروعة دى بجد والله عرفت تعبر صح عن الخيبة اللى احنا عيشينها
    كلماتك جت فى الجون
    المصيبة ان الغلابة بيدفعوا من دمهم وبرضه مش بينفع الكبار بس اللى بياخدوا كل حاجة حتى دم الغلابة المهم انت مين ومعاك ايه ده شعار داوقتى

    حسبى الله ونعم الوكيل
    بجد كلمات هايلة صورت منظر متحرك واقعى رائع
    تسلم ايديك

    ردحذف
  3. واللي معاه قرش يساوي قرش
    واللي ممعهوش مايلزموش
    هههههههههههه

    والله العظيم نزلت اشتري خضار من شوية لقيت واحدة بتقول لبياعة الخضار روحي ادفعي الف ونص علشان يسيبوكي تبني في ارضك

    قالتلها قوليلي ادفع لمين وانا اروح

    كان هاين عليا احدفها بالبطسطاية في وشها

    كلماتك بجد بتعبر بالظبط على المصيبة اللي احنا فيها

    ربنا يستررررررررر

    تحياتي

    ردحذف
  4. السلام عليكم
    بحج بوست رائع
    دفعت انت كام عشان تكتب كده
    والله بوست فى الحون
    تشرفتى زيارتك

    ردحذف
  5. دفعت عمرى وحبه كرامه هما الى حيلتى
    دفعت عرقى
    ودمى وعفيتى
    ومن كرمتى دفعت الكتير

    دى الفيران ليها فغبتها مقام كبير

    سيبك انت

    اسلوبك روعه

    تسلم ايدك

    ردحذف
  6. دفعنا كتيير والله العظيم بس مبناخدش حاجة

    ردحذف
  7. السلام عليكم
    بذمتك انت دفعت حاجة
    على العموم القصيدة حلوة
    تحياتى

    ردحذف
  8. دقعت شغل كتير قوي والناس تقول ما دام بيشتغل اديله وشيله اما اللي بيكروت وبيهنكر وبياخد الامور بالدراع فده هن اللي مرتاح ومش دافع اي حاجه
    انت فين يا عم هاني بطلت تيجي الورشة ليه ح نستناك بكره ولا انت خلاص نسيب ت

    ردحذف
  9. فتاه من الصعيد
    شكرا جدا ليكى لمتابعتى دايما بجد انتى من الناس اللى بستناها دايما تقبلى احترامى


    مى

    اولا نورتينى وطبعا وحشتينى ( حاجة كدة من بتاعة الموضوع بتاع النت )
    ثانيا انا مستنى ردك على تعليقى عندك ( وماتستعبطيش)
    شكرا جدا ليكى ورأيك دايما مهم بالنسبالى

    زهور الامل
    انا مش عارف من غيركوا انا ممكن اعمل ايه انا بيتهيألى انك لو بطلتى تيجى هنا هقفل المدونة انتى والناس الحلوة اللى متابعانى دايما
    انا لو مكانك كنت اديتها بالبطاطس فى دماغها وبعدين هسألها على اسم الراجل عشان يمكن احتاجه ( الناس غلبانة يا زهور )

    ردحذف
  10. مهاجر فى وطنى
    momken

    مرحبا بكم فى مدونتى واتمنى انكوا تكونوا متابعين ونتواصل دايما لان رأيكم مهم جدا بالنسبالى


    حلم بيعافر
    مرحبا بيك حمدالله ع السلامة
    احنا بندفع تعب وشقى وعمر
    لكن مابندفعش مصالح وفلوس وكرامة
    والحمد لله على كدة


    سارح فى ملكوته
    رغم انى زعلان منك عشان مابقتيش متابعة لكن احنا اصحاب برده وبلاش تخلينى احطك فى اللستة اللى انتى عارفاها ( انا منتظرك على الفيس بوك فى اى وقت )


    nudy
    ما هو احنا اللى لازم ندفع لاننا بنحترم نفسنا وبنحب شغلنا وبنحب البلد اللى محتاجانا وفى النهاية احنا بنعامل ربنا
    انا عمرى مانسيتكوا
    انا جاى بكرة ياستى عشان خاطرك بس

    ردحذف
  11. بطلوا حقد طبقي بقى
    طول ما الفقرا اللي زيك بيحقدوا على الأغنيا اللي زيي مش هنطور أبداً

    ردحذف
  12. محمد سلامة

    ماشى ياعم الحاج

    ردحذف
  13. هي دي مصر وهم دول المسئولين في مصر
    بس هو دفع كتير بس من جيوبنا
    في انتظار تشريفك لنا بالزيارة
    صلي علي النبي

    ردحذف
  14. اذا كان علي الشعب بيدفع كتير بس مش مستفيد
    -----------

    من اجل
    وطن آمن مستقر...حياة افضل.
    من اجل
    محاربة الفساد....مقاومة التزوير
    من اجل
    ان تكون مقدرات هذا الوطن بأيدينا
    شارك في الحملة الشعبيه للقيد بالجداول الانتخابية
    ضع شعار الحملة علي مدونتك

    ردحذف
  15. عاشق الجنة من الإخوان صلى على النبى

    م/ الحسيني لزومي

    انا سعيد جدا بزيارتكم لاول مرة
    واتمنى انها تدوم
    وشكرا جدا لأرائكم

    ردحذف