الأربعاء، 7 أكتوبر، 2009

عيل

عيــــــــل


- يا طالع الشجرة ..
هات لي معاك بقرة ""
- إزاي البقرة...
تكون من فوق ؟!!
- ششش
نام يا حبيبي نام
وأدبح لك جوزين حمام .
مابحبوش
- شش
" أنا الديك الأخضر الأخضر
امشي الحيط واتمخطر "
- إزاي الديك بيغني ؟!!
وإزاي الديك يبقى أخضر ؟!!
- يووه
- من صغرى بفكر
ما تعديش كلمة فـ حدوته
أو غنوة
غير لما أعقلها
وأتدبر
إزاي استنى اللبن الأبيض
من بقرة عايشة على الشجرة ؟!
إزاي التعلب يتكلم !!
وإزاي الفار الطيب فـ الحدوته .
إما أمي تشوفه بتجري وراه
وإزاي الغولة
ما تبقاش غولة فـ عز الشمس
وتتحول للناس بالليل
وإزاي .. ؟؟
وإزاي ؟؟
وإزاي .. !!
وإزاي .. ؟!
وأما كبرت ..
سمعت الأخبار فـ النشرة
وعرفت سياسة
وتابعت ظروف الناس
واتخرجت وما اتوظفتش
صدقت
وبطَلت أفكر .

هناك 6 تعليقات:

  1. هههههههههههههههه

    جميله ..... ماهو دايما العيال بتفكر

    ولما تكبر بتتغابى علشان متفكرش

    تحياتي

    ردحذف
  2. ايه ده
    هو انت كان عندك الحواديت دي برضو
    ياريتنا فضلنا صغيرين ومكبرناش علشان منشوفش الواقع الاليم اللي احنا عايشين فيه
    والله الواقع ابشع وافظع من الخيال
    ولو فكرنا فيه هنموت

    تحياتي

    ردحذف
  3. لولولولولولولولولولوى
    وسع ياد انت وهو وهى
    هانى بيه الكبير وصل
    اخيرا يابرنس
    وينك يا عمونا من زمان طلعت عينى
    كل يوم اجى القى نظره وانت ولا انت داريان
    الحواديت دى الله يسامح اهلنا عليها بجد
    زى الست امى ربنا يطول لى ف عمرها
    كانت تحكيلى عن الشاطر حسن ابو حماره عرجه
    وتصدق
    كلى امل لحد الان ان الحدوته تطلع صح
    ههههههههههههههههه
    بس انت يا بختك مكنتش اهبل زى حالاتى وبتصدق كل حاجه تتحكيلك
    هانى
    هانى
    هانى
    اياك ثم اياك ثم اياك
    وده تهديد من صعايدة مصر يا جدع
    انك تختفى تانى
    والا هزعل وانا زعلى وحش
    وهقلع بشعر راسى ف عز الضهريه واقول فيك واسمع يارب
    ماشى الكلام
    سلام
    :)
    نسيت اقولك
    الكلام هنا
    تحففففففففففففففففففه

    ردحذف
  4. ههههههههههههههههههههههلا بجد عثللللللللللل
    طب كانوا بيعملوا فيك ايه ها ها قولى ههههههههه هى رخامة بصراحة يعنى احنا كتر خيرنا بنحكيلك قصة الله؟ تقعد بقى تتفلسفلنا يوووووهلالالالالالالالالالا سيب غيرك يسمع بقى اقعد ساكت ياهانى
    لا بس بجد ماشاء الله كنت بتفكر وتحلل وانت صغير وده كويس لان الطفل مش بياخد معلومات وخلاص لا بالعكس بيقعد يشوف المتناقضات
    حلو البوست بجد بس ايه ده انا بلغت عنك ابحث مع الشرطة
    فييييييييييينك كل ده
    متغيبش تانى بقى

    ردحذف
  5. السلام عليكم

    الاول
    يا رب تكون بخير وبصحه وسعاده
    ثانيا
    انا مش جاى اعلق على مضمون الكلام اللى هو يعنى المقصود بيه لانى ذهقت والله من إظهار الحقيقه المره كل شويه
    انا جاى اعلق على الموهبه بتاعتك
    افكارك جميله اوى وبتقدر تعبر عنها بالكلام بطريقه لذيذه اوى بتعجبنى كتييير
    تسلم ايدك يا كبير

    ردحذف
  6. فتاه من الصعيد
    انا مش عارف اشكرك قد ايه على متابعتك لمدونتى وانك تكونى دايما اول المعلقين(غالبا )
    بجد شكرا ليكى وبعدين مش بتتغابى لكن بتفهم سياسة


    زهور الامل

    بالعكس لازم نكبر ونفهم ونحاول نغير ايتها الصديقة


    واحدة من الناس

    مهما هقول واكتب مش هعرف اديكى حقك فأحيانا يكون الصمت ابلغ تقدير لان الكلام لا يستطيع التعبير عن هذه الحالة التىانا بها عندما قرأت تعليقك
    يارب تكونى متابعة دايما يا ست الكل



    مى العثل ( العسل )
    شكرا جدا جدا جدا جدا على تعليقك ومتابعتك
    وبعدين بلاش تجيبى سيرة الشرطة هنا ( يجعل كلامنا خفيف عليهم )
    عشان لو حصلى حاجة هقول ان مى هى اللى كانت معايا وهى اللى بتحكيلى الحكايات السياسية دى


    اقدم عاصمة ( صديقى العزيز )
    حمدالله ع السلامة
    انا سعيد جدا برأيك ويارب اكون عند حسن ظنك دايما وافكارى تعجبك

    ردحذف