الأحد، 20 سبتمبر، 2009

فطار ...لعب كورة ....وفطار ولعب كورة

( حدث فى رمضان 2)
اول حاجة كان فطار جماعى عند مطعم حضرموت كان الفطار ده المفروض يكون فيه ناس كتيرة قوى شباب وبنات لكن للأسف لأن البنات دايما على خلاف فى كل حاجة وبيعقدوا الدنيا قررنا يكون الفطار للولاد بس ( احنا الولاد ) كان معايا فى الفطار ده محمد زوام ( صاحب مدونة امن دولة ) وحسام فاروق ( صاحب مدونة ورا المراية ) و محمد فوزى ( صاحب مدونة السيد الرئيس ) وعمر محمود ( صاحب مدونة ابو عبدالله _ على ما أعتقد )وانا طبعا ( صاحب مدونة بحب الحكومة ) وكان معانا أحد المعجبين بنا واحد اسمه على ما أعتقد مصطفى علام ( مقضيها فيس بوك ) اليوم كان حلو قوى على عكس بدايته من اعتذار لأتنين كانوا المفروض يبقوا معانا وهما ( حاتم سعد و محمد سلامة ) ومش هذكر اسماء مدونات تانى عشان مجوش المهم نزلنا شارع البطل احمد عبدالعزبز ودخلنا المطعم وفضلنا قاعدين ونزلنا السلطات والبلح وانتظرنا المدفع وقبل المدفع بخمس دقايق نكتشف ان المطعم مش فيه فراخ واخنا كلنا كنا متفقين ناكل فراخ ( فيه لحمة بس ) فقررنا كلنا ان احنا نقوم نروخ اى مكان تانى بيقدم فراخ ومشينا لغاية فرع تانى من المطعم وفعلا كان عندة فراخ وبدأنا الأكل وبدأنا الضحك كل مانفتكر موقف نضحك ونجيب فى سيرة الناس والمطعم كلة من عاملين كان بيتفرج علينا وحسام بيصورنا جنب الاطباق الممسوحة والزبالة اللى عملناها المهم خدنا شوية صور فى المطعم واتكلمنا على التدالة بتاعتنا اللى عملناها فى البنات اللى المفروض كنا نتصل بيهم لكن قررنا نخوض التجربة لوحدنا عشان نبقى براحتنا ( على رأى زوام ) وما حدش يخنق علينا ( على رأى حسام ) ومنبقاش متكتفين ( على رأى محمد فوزى ) وأيوة كدة ( على رأى عمر ) وبالنسبة لمصطفى علام كان أصلا مش هييجى لولا أنا أصريت على زوام انه يتصل بيه لأنه بيضحكنا جدا من كلامه وأفكاره ( شكله كدة هيولع فيا ) وده اللى حصل فعلا لما خرجنا من المطعم وقررنا نروح قهوة فى بولاق ( ماحدش يسأل اشمعنى بولاق ) ورسينا على قهوة فى جامعة الدول جنب فرغلى بتاع العصير المهم أخدنا كام صورة جنب النافورة وغرقتهم مية من النافورة وكان مصطفى هتشيله عربية لأنه جرى ونزل من الرصيف على الطريق عدل والمية جت فى واحد راكب موتوسيكل ومعاه واحد تانى لكنهم بصوا وضحكوا ومشيوا ( وهوة ده الشعب المصرى ) رحنا القهوة وبدأنا نتكلم على كل حاجة وإستلمنا مصطفى علام وبدأنا نسأله حاجات خاصة ولخبط الدنيا ( مش هينفع أحكى عشان البنات اللى يعرفهم مصطفى ما يزعلوش ) مع انه عنده حق ( خاجة كدة تهدى مصطفى عليا ) المهم اتكلمنا فى حاجات مميزة وكان لمحمد فوزى رأى فى حاجة مميزة جدا وبعد كلمة محمد فوزى قررنا نقفل الموضوع
فى حاجات بقى حصلت تضحك من مصطفى لكن كفاية كدة عشان الرقابة .

لعب كورة
كان يوم 25 رمضان وكان فى الوراق وكانت المباراة بتجمع مجموعة من الشعراء وكتاب القصة والنقد ومنهم على سبيل المثال لا الحصر ايمن مسعود ( صاحب كتاب للبيت رب ) محمد منصور ( صاحب كتاب الارض تشربها الدماء ) ومصطفى على كان بيتفرج ( صاحب كتاب حروف مقطعة لإله شبه متماسك _ اسف لو مش فاكر اسم الكتاب بالظبط لأنه يلخبط ) وشعرا تانيين زى حسام جويلى واحمد خطاب وناس تاية المهم لعبنا لغاية مازهقنا وبعدين روحنا القهوة وقعدنا لغاية السحور وكانت المناقشات عن الادب والثقافة والشعر وانضم لينا أحمد عبدالجواد ( صاحب كتاب وكأين ) وكان فيه ناس ادباء لكن بصراحة مش أعرفهم شخصبا او اعرف اصداراتهم
كفاية كدة عشان الماتش التانى اهم .

فطار ولعب كورة ( يوم الجمعة 28 رمضان )

اتفقنا اننا نفطر مع بعض جنب الملعب وننزل نلعب على طول وفطرنا عند المطرب مصطفى ابراهيم واخوه الزملكاوى محمد ابراهيم وكان على الفطار محمد منصور و احمد خطاب ومحمد زوام وايمن مسعود ( نم ذكرهم قبل كدة ) وسالم الشهبانى (صاحب كتب ولد خيبان و السنة 13 شهر والقطة العامية و الملح والبحر ) وكريم ماهر الشاعر الاسمر وشوية ممثلين خايبين منهم واحد اسمه احمد صلاح .
خلص الفطار ونزلنا الملعب كلنا واكلين ومش قادرين نتحرك انقسمنا فرقتين أنا بقى هتكلم على فرقتى بس ( فرقة الشعراء ) كان فيها شعراء العامية محمد زوام وسالم الشهبانى وأنا وشعراء الفصحى ايمن مسعود ومحمد منصور وقطعنا الفرقة التانية وكسبناهم ماتشين كانوا روعة من احلى المباريات اللى لعبناها فى رمضان وبعد ما خلصنا روحنا القهوة كالعادة ولكن المرة دى كانت مختلفى لأن كان معانا محمد ابراهيم الزملكاوى اللى خلانا نشد فى شعرنا وخربنا الدنيا لدرجة ان الكل الناس اللى قاعدة على القهوة والعاملين فيها سابوا كل حاجة وبدأوا يدخلوا فى المناقشة مع الزملكاوى ده لمدة 3 ساعات مش قادرين نغير الموضوع ولا قادرين نسكت الزملكاوى لغاية ما قرر البعض ينسحب ويمشى وكنت انا منهم ..فى حاجات تانة فى اليوم ده تتحس بس لكن مش قادر أكتبها خصوصا واحنا بنلعب قد ايه فرحتنا لما بنجيب جول حلو او نكسب ماتش او نختلف على فاول او جول وقد ايه فى ناس لما تقرب منها تلاقيها بسيطة قوى .

اعتذار
لكلا من عزة ابوالأنوا ( صاحبة مدونة انسانة ) وغادة خليفة ( صاحبة مدونة ست الحسن ) لأنهم كانوا اكثر الناس حماسا للإفطار الجماعى الأولانى وطبعا شيمو وأكوم لأنهم كانوا منتظرين مجرد اتصال للذهاب معنا .

حاجة أخيرة
كل سنة وانتوا طيبين والمسامح كريم

هناك 14 تعليقًا:

  1. كل سنه وانت طيب

    بس ايه النداله دي ... خليتوا بالبنات :D

    ردحذف
  2. انا سحلانة سحلانة سحلانة

    بقى البنات بتوع عقد ومش عارف ايه
    مااااااااااااشي
    الله يسامحك

    والله البنات مايستهلوش الحركات القرعة بتاعت الرجالة دي

    على العموم البنات هيطلعوا احسن منكم وهقولك كل عام وانت بالف خير وهنا وعيد سعيد وربنا يتقبل منك صيامك وصلاتك وقيامك

    تحياتي

    ردحذف
  3. هههههههه شايف بقى كل اللى علقوا عندك بنات ده انتوا مش هتسلموا منا نيهاااااااااااااااااااا جالك الموت ... ان ان ان
    بس انا عايزة اعرف صاحبكوا مصطفى قال ايه ههههههههه متعلقناش بقى
    كل سنة وانت طيب

    ردحذف
  4. الله...اكيد قضيتوا وقت لطيف ماشاء الله

    ربنا يسعد اوقاتكوا كلها

    ردحذف
  5. السلام عليكم ورحمة الله وبركاتة
    كل سنة وانت طيب ..وعيدك مبارك
    ياريت تساعدنى فى حملتى "مدونتك هتنقذ طفللك"وهى فكرة بسيطة بس ان شاء الله خيرها كبير وانا عارف ان الى بيحترموك ويقدروك

    كتير فياريت تشاركنى وكل الى يحب فى الحملة دى وعن فكرتها وكل حاجة عنها فى اللينك دة ورجاء تدخل وتشفها امانة وجزاكى الله

    خيرا والمسلمين .
    http://rasoulallah1.blogspot.com/

    ردحذف
  6. عزيزي هاني
    كل سنة وانت طيب
    وعيد سعيد

    وعلى فكرة الفرحة اللي كنت حاسس بيها ومش عارف تكتبها وصلت قوي من وصفك الجميل .. ربنا يديم عليك مشاعر الصداقة الجميلة

    ردحذف
  7. كل سنة وانت طيب
    وايه اليوم الملخبط ده

    ردحذف
  8. السلام عليكم ورحمة الله وبركاتة
    جزاكم الله خيرا على مشاركتى فى حملة (مدونتك هتنقذ طفلك)وان شاء هنبدأ من غدا 29 / 9 / 2009 النشر الجماعى .. لموضوع الحملة الموجود
    بمدونتى عن طريق كوبى وبست (نقل ) للموضوع بأكملة بمدونتك الجميلة مع اى تعديل تجدوة مناسب مع الاحتفاظ بصلب موضوع الحملة المتمثل فى الاسم و طرق
    التبرع الجديدة حتى يتسنى لنا مشاركة عدد اكبر فى الحملة . .
    وربنا يكرمك يارب على التعاون ويجعلة ان شاء الله فى ميزان حسناتكم والمسلمين اللهم امين .
    ملحوظة :- النشر مستمر ان شاء الله بس البداية من غدا ومن دواعى سرورنا ان تشتركوا من غدا (ساعدونا ليعم الخير بأذن الله )1

    ردحذف
  9. بتعدى الأيام و رمضان خلص و العيد خلص لكن ذكريات اللمة و الصحاب و المشاعر الحلوة اللى باينة فى بوستك اوى عمرها ما بتتنسى
    كل سنة و انتم طيبين

    ردحذف
  10. كل سنه وانت طيب

    وربنا يجمعك دايما بحبايبك علي خير

    حلوه الصحبه

    وحلو مصر

    بس ايه هما دول المصريين

    يا رتني كنت انا اللي اترش عليه ميه

    متعرفوش كنت عملت ايه

    تحياتي

    ردحذف
  11. اولا انا والله جيت قبل كده وقريت وسبت تعليق ومش عارفه اختفى فين
    حاجه غريبه والله
    ثانيا
    انا زعلانه انك بطلت تكتب
    وانا بستنى منك كل جديد لحد ما زهقت
    وكمان انت نسيتنى خالص وبطلت تيجى تزورنى فقلت اريحك منى شويه
    وبما انك سالت
    يبقا كفايه تقل علينا وارجع اكتب اى حاجه
    وارجع زورنا تانى
    والله يا هانى بتفرق معايا زيارتك وبحب جدا اقرالك حاجات جديده
    :)
    هستنى

    ردحذف
  12. انا جيت تانى واكتشفت
    اسمعت ان ناديت حيا
    لكن لا حياة لمن تنادى
    :(

    ردحذف
  13. شكرا لكل الناس اللى علقت

    انا من غيركم مش اى حاجة


    (واحدة من الناس )

    حمدالله ع السلامة

    ردحذف
  14. ده ليه
    اه صح
    حمد الله على سلامتى

    ردحذف