الأربعاء، 9 سبتمبر، 2009

( حدث فى رمضان 1 )

اولا: فوز إيمان سيد بلال بالمركز الاول بمسابقة الساقية لشعراء العامية

الموضوع ده فيه كلام كتير قوى من اول اعلان الجايزة ولغاية تكريم العشرة اللى كانو مرشحين ( او فائزين ) فى اتيليه القاهرة امبارح (8/9/2009 )لأن الجايزة غير متوقعة من اى حد ولما الناس سمعت العشر شعراء كان الترشيحات تصب لصالح مجموعة كبيرة من الشعراء وكانت إيمان غير مرشحة بالمرة لكن إسمحوا لى أن أقطع الرسالة أقول لإيمان :

( ألف ألف ألف مبروك على الجايزة وعلى الفوز )

نكمل بقى .....الحكاية تبدأ آخر يوم فى المهرجان واليوم ده بيقولوا فيه العشرة المرشحين بالجايزة وبدأنا إحنا كمستمعين نقيم الشعرا عشان جايزة الجمهور وطبعا كنت أعرف أغلب الشعرا المكتوب أسمائهم فى البنفلت وبعدين سمعت إسم إيمان بلال وبصيت وإتفاجئت ان ايمان بلال هى هى ايمان سيد اللى انا اعرفها عن طريق جماعة آدم ( انا مش عضو جماعة آدم ) وبصراحة إستغربت إنها من العشر شعراء وبدأت أسمعها لقيتها تطورت عن ما كنت أعرفها لكن ناس كتير قالوا إزاى دى تكون من ضمن العشرة وبعد شوية أعلنوا نتيجة الجمهور وكانت هى فى المركز السادس أو السابع _ لأن فى ناس أقل منها من الشعراء العشرة وإلقائهم كان سئ جدا وبدأنا نسمه رأى لجنة التحكيم الأولى اللى كانت تقريبا رأيها من رأى الجمهور وكان فى شعراء متألقين جدا وأخدوا مراكز أولى ثم جاء الميعاد لإعلان الجوائز وبدأت بالمفاجآت من حصول خليل عز الدين ووائل فتحى على المركز الأخير وقبل الأخير ومرورا بأشرف عبدالحى فى الركز الثامن إلى أن جاءت اللحظة الحاسمة وهى إعلان فوز ايمان سيد بالمركز الأول
عايز أقولكم والله العظيم أنا فرحت جدا جدا للبنت دى لأنها مجتهدة جدا وحد ليه لون مختلف _ انا عارف ان فى ناس هتضربنى على الكلام ده _ لكن عايز أقول برده إن إيمان أو حد يعرفها هيقرا الموضوع ده وهى ماتعرفش أصلا إنى عندى مدونة ولا حد من اللى هيقرا الموضوع ده يعرفها وممكن يقولها _ الكلام ده أنا بقوله لأنى بجد كنت سعيد بفوزها لأكثر من سبب وأنا ذكرت منهم حاجات ... المهم إنى سمعت كلام كتير فى اليوم ده معجبنيش لكن كنت بقابل ده بالصمت أو تغيير الموضوع لأنى مهما هقول عن سعادتى بفوزها ماحدش هيصدق وخاصة أصحابى المقربين لأنى سمعت أرائهم وتخيلاتهم وتطاول البعض لكن ما أقدرش أقول غير ألف مبروك يا إيمان بالعند فى كل واحد وواحدة مش عاجبهم فوزك
وفى حاجة دايقتنى جدا يوم الجايزة لازم أقولها لأنها خنقتنى جدا وهى : إن فى ناس كتير جدا كانوا بيباركوا لإيمان بالفوز وبيضحكوا ويهزروا معاها وكل واحد بيتسابق ويقول ألف مبروك ولكن أرائهم فى غياب إيمان كان غير كدة فشكرا لكل واحد كان زعلان من فوز إيمان وقال ده بصراحة ومارحش باركلها لأنه إحترم نفسه ولم نفسه ومشى .

كلمة سر ماحدش يقولها لأى حد ( بعد إعلان الجايزة بلحظات والناس بتبارك لإيمان كنت أنا وأختها وواحدة تانى وواحد يهمه أنه يدافع عن فوز إيمان بالجايزة كنا بس اللى قلبنا أبيض ) وماحدش يفهمنى غلط وإن بعض الظن إثم




ثانيا : أنا خريج مدرسة مبارك العسكرية

كل واحد مننا ليه عاداته وحاجاته الخاصة فى رمضان وخصوصا فى الفترة اللى بعد العشاء لغاية السحور مثلا فى ناس بتحب تنزل تقعد على القهاوى وناس بتقضيها قدام التليفزيون وناس بتتمشى فى وسط البلد وحاجات تانية كتير .
أنا بقى لما يكون مش ورايا حاجة أحب أنزل أتمشى فى إمبابة _ أنا بحب امبابة جدا جدا _ وأروح كل الأماكن اللى ليا فيها زكريات سواء كانت الزكريات دى حلوة أو وحشة فمثلا يوم أروح عند مراكز الشباب اللى لعبت فيها أو مسرح مركز شباب امبابة أو مدرسة ابتدائى أو اعدادى او ثانوى وهنا انت البداية .
( انا خريج مدرسة امبابة الثانوية العسكرية )
المدرسة دى كانت البداية لكل شئ واقعى فى حياتى ونهاية لكل أحلامى البسيطة قضيت يها احلى ايام حياتى وأسوأ ايام حياتى برده _ هبقى أحكيلكا فى تدوينات تانية عن مغامراتى فى المدرسة دى _ المهم وأنا بلف حوالين المدرسة وفجأة وبدون سابق إنذار وجدت اسم المدرسة :
( مدرسة مبارك الثانوية العسكرية )
أنا قلت إنى تهت وجيت منطقة غلط أو تأثير الصيام عليا لسة مستمر أو على رأى جمال إسماعيل الأرض كرويتن تلفو حول نفسها يعنى مدرسة امبابة كانت هنا لكن نتيجة لدوران الارض بقت فيه مدرسة تانية لكن تصميم المدرسة زى ماهوه لكن طبعا حطولها شوية روج فشكلها بقت بنت ناس وكتبوا يافطة جديدة عشان تمشى مع لون الروج وفجأة لقيت نفسى بعد إكتشاف الحقيقة وتغيير اسم المدرسة من مدرسة امبابة الثانوية العسكرية الى مدرسة مبارك إتسمرت مكانى للحظات عدى فيها شريط زكرياتى مع المدرسة بسرعة جدا وحسيت ان فى حد بيمنتج الزكريات دى وبيمسحها وفقت على صوت تكتك ولقيت نفسى ى نص الشارع والناس بتبصلى ومستغربة ورجعت البيت وأنا شحون جدا غضب لإنى بصراحة معترض على تغيير اسم المدرسة من امبابة الى مبارك ليس اعتراضا على الرئيس او تقليلا منه او الموضوع له علاقة بالسياسة ابدا والله لكن لأن مدرسة امبابة اللى طلعت علماء وفنانين ولاعبين وحرميين برده وكانت علم للمنطقة فجأة بقت مجردة من الاسم اللى فضلت بيه طول عمرها .
أنا معترض على تغيير اسم مدرستى وهفضل معترض وسوف أقود حملة فى الفترة القادمة للمطالبة بعودة اسم المدرسة كما كان وسوف اراسل وابحث عن كل خريج من هذه المدرسة مؤمن بهذه القضية اللى لو قعدت طول عمرى مش هنساها أو هسكت عنها مهما حصل
إمضاء :

خريج مدرسة امبابة العسكرية

هناك 13 تعليقًا:

  1. هو ايه اللي حدث في رمضان 1؟؟؟

    ردحذف
  2. يعني ده عنوان ولا ده البوست ولا ايه ولا انا مهيسة من الصيام ولا ايه؟؟؟

    ردحذف
  3. ايون؟
    اؤمر يا فندم
    خير
    فين الحدث
    اشتغاله دى ولا ايه؟
    طاب الحل نتصل برقم كام سيادتك
    0999999999999999
    ولا كام
    ولا نتصل بالعباسيه؟
    طاب دى مسابقة كرومبو؟
    ولا حدث فى مثل هذا اليوم؟

    ردحذف
  4. انت بتعمل دعايه ياهانى للبوست ولا ايه
    بقا انا اصوم اصوم وتفطرنى على بوست بسطر؟
    دانا اصوم انقطاعى احسن
    لم سطرك ياعم وقوم نام
    قوم الله يهديك
    حوش اللى وقع منك
    شكله سطر وقع من البوست ولا حاجه
    حد ينبهه يا جدعان
    ياعم هااااااااااااااااانى

    ردحذف
  5. طاب انا رجعت فصصت المدونه يمكن الاقى اقى البوست مستخبى هنا ولا هنا وملاقيتش
    اعمل ايه انا دلوقتى
    يالا ارجع مدونتى
    طلع بوست كاذب
    :(

    ردحذف
  6. ايه ده ده البوست ظهر
    هو كان مستخبي تحت الكرسي ولا ايه

    نيجي بقى للبوست

    اولا الف الف مبروك لايمان ولو اني معرفهاش
    بس الف مبروك ليها ولكل انسان مجتهد وربنا يوفقها

    ثانيا انت زعلان ليه على اسم المدرسة انه اتغير
    ما كل حاجة في حياتنا بتتغير
    انا كمان اسماء مدارسي الاعدادي والابتدائي اتغير ومزعلتش ولا حاجة
    لن كل شيء قابل للتغيير وللتطوير
    خليها في نفسك بس انك خريج مدرسة امبابة العسكرية ومتتعبش نفسك لانك هتلاقي الكل مطنش
    ومفيش حد لسة بيدور على الحاجات دي في زحمة حياتنا ويومياتنا

    تحياتي

    ردحذف
  7. السلام عليكم
    الف مبروك لايمان
    وبعدين هو انت عملت ايه فى المهرجان
    اما عن التغيير انا مأيداك جدا وانا والحمد لله كل مدارسى لم تتغير
    ولكن ببشرك فعلا هتلاقى ناس كتيير مطنشة
    سلام

    ردحذف
  8. الف مبروك لايمان " اللي مش عارفاها "

    وبالنسبه للمدرسه .... فده عادي .... احنا عندنا كل حاجه بقا اسمها سوزان مبارك " لانها بلدياتنا " لدرجه ان في تلات مستشفيات باسمها ..... ولما تقول لتاكسي مستشفى سوزان مبارك .... تلاقي الراجل متلخبط ويقولك انهيي فيهم ..... اللي فوق ولا اللي تحت اللي شرق ولا اللي غرب .... وويلف حوالين نفسه

    ردحذف
  9. ويخلق ملا تعلمون
    البوست ظهر يا جدعان
    الحمد لله
    مبروك لايمان ياعم هانى وانا ولا اعرف ايمان ولا اختها ولا الواحده التانيه ولا الواحداللى معاهم وقلبه ابيض
    ايه المشوار الطويل ده
    ماعلينا
    بالنسبه لمدرسة امبابه اللى لبسوها طقم جديد وحطولها روج وبقت بقدرة قادر مدرسة مبارك
    معاك حق والله
    قال لك حاجه هيغيروها وتصدق بالله دول عاملين زى الشطرنج شاك ميت
    مات الملك عاش الملك
    واهو كل بيطلع ف الغسيل
    ولاتتعب انت اعصابك مفيش فايده يا ولدى
    والله لو جبت طبله وتار وقعدتللصبح قدام الباب بتاع مدرستك ماهيتغير حاجه
    انت عايزهم يعتقلوك باعتبار انك عايز تسقط الريس من على المدرسه
    انا ماليش دعوه ياعم
    انا بعيد عنك
    لم تعابينك ياهانى واقصر الشر احنا عايزينك يا ضنايا
    :)

    ردحذف
  10. ههههههههههه انت كنت فين بقالك زممممممن طااايب كويس انك جيت مبرووك لايمان اولا وطبعا فى اعداء كتييير لما بينجح الانسان بس يلا ما علينا بالنسبة للمدارس
    هههههههههههه انا كمان بحب الحكومة ها مش عايزة اقضى العيد واكل عيش وحلاوة لا عايزة كحك
    هههههههههه كل سنة وانت طيب

    ردحذف
  11. يا جماعة انا كنت بعدل فى البوست وانتوا دخلتوا

    كنت لسة ما خلصتوش



    وبعدين كل اللى معلق بنات برده

    ربنا يخليكوا ليا


    ( مش قولتلكوا دنجوان )

    ردحذف
  12. واحدة من الناس


    واحدة من الناس


    واحدة من الناس


    واحدة من الناس

    واحدة من الناس


    واحدة من الناس



    واحدة من الناس

    ردحذف
  13. والله أنا شايف إيمان شاعرة مختلفة ومتميزة فعلاً، أنا معرفش كل الدواوين اللي شاركت في المسابقة، بس لما عرفت أن إيمان فازت بالمركز الأول ما اندهشتش.

    ردحذف