الأربعاء، 19 أغسطس، 2009

بحب الحكومة

ردا على قصيدة لصديقى أشرف توفيق بعنوان ( بخاف م الحكومة )


بحب الحكومة وماشى فى حالى
لا بعرف يمينى ولا اعرف شمالى
لا عمرى بفكر بإنى اشتكى
ولا مرة حتى فى يوم إعترضت
لذلك فإنى مواطن مثالى
لا بعرف يمينى ولا اعرف شمالى


اخدت الشهادة فى علم المحاسبة وعلم الادارة
واصبحت فاهم أصول التجارة
وياما قالولى الوظايف كتيرة
وياما قالولى سلاحك شهادتك
واحلم براحتك
وارسم حياتك
وخطط وقايس
وبعد التخرج لقيتنى لوحدى
بفكر ولايص
ولكن لا يمكن بإنى اعترض
لأنى فى حالى مواطن مثالى
بحب الحكومة
لا بعرف يمينى ولا اعرف شمالى




وايه يعنى لما ما لاقى الوظيفة
طالما حياتى شريفة ونظيفة
وواخد حقوقى
مواطن وعاطل برتبة محاسب
ودايما محاسب وعارف حدودى
وعارف حقوقى وواجبى ومبادئى
لا يمكن افكر بإنى ابقى طايش
واسمع وانفذ لا يمكن اناقش
يقولوا بلاش الخروج فى المظاهرة
انا اقعد فى بيتى
يقولوا بلاش اعتصام او مقاطعة
لا يمكن اقاطع
يقولوا مافيش تعيينات فى الحكومة
لا يمكن امانع وارضى بقدرى
يقولوا بلاش الكلام فى السياسة
فأصرخ واهتف
ارقص ياحضرى ارقص يا حضرى
ولكن لا يمكن بإنى اعترض
لأنى فى حالى مواطن مثالى
بحب الحكومة
لا بعرف يمينى
ولا اعرف شمالى





كفاية انى بحلم
وبحلم براحتى
ماحدش بيقدر فى حلمى يحاسبنى
فبحلم ببيتى وزوجتى وابنى
وكتبى وشعرى
وافوق ع الحقيقة
لا بلعن حياتى
ولا العن سكاتى
وطول عمرى عايش بنفس الطريقة
انا احلم وبس
افكر وبس
واموت كل مرة
لا يمكن فى مرة هتسمع لى حس
لانى فى حالى
مواطن مثالى
بحب الحكومة
لابعرف يمينى
ولا اعرف شمالى




ولكن زهقت وبطلب طلب
واظن انه حقى
طالما ان طلبى فى غاية الادب
لا طالب وظيفة
ولا حتى بحلم بلقمة ونظيفة
ولا بحلم انى ازور الحرم
وعارف جنابكوا ...
فى غاية النزاهة وآخر كرم
فنفسى فى مرة اعدى ف كمين
وبعد المسائلة ...

اكون محترم

هناك 22 تعليقًا:

  1. هههههههههههههههههههه
    وكمان
    ههههههههههههههههه
    بقا ياراجل انت لو كنت طلبت لقمه ونضيفه رغم استحالتها اسهل من انك تتقفش ف كمين وتطلع منه زى مانت محترم
    يابنى فوق انزل لارض الواقع
    اقولك
    بلاش
    روح عدى ف كمين
    هو قلم واحد
    وهتفووووووووووووووووق
    قال طلب وف غاية الادب قال
    عشم ابليس ف الجنه
    ياعم روح
    دول عالم بيحبوا يرحبوا بيك
    ضيفهم وبيحيوك
    ياخراشى طلباتك كترت والله انا ماعارفه الحكومه هتلاحق على طلباتنا منين ولا منين
    يالا الله يهد
    قصدى يهدى الجميع
    ويجعل كلامنا خفيف عليهم
    بس كلامك بجد مذهل
    ايوه كده صحصح امال
    بقالك فتره عامل بيات صيفى
    يالا بقا همه ونشاط وكلام م اللى يوجع
    اسيبك انا وهرجع بعد شويه
    تكون كتبت حاجه كمان
    سلامو عليكو

    ردحذف
  2. حلوة جدا جدا جدا
    انت رائع بجد
    طب ايه رأيك بقى اجمل كمان من اللى فاتت

    بس ايه بصراحه مواطن مثالى برتبه محامى ههههههههه
    على اساس ان التخصص مش فارق بقى

    بجد جامدة جدا سعيدة انى قريت موضوعك الجميل اللى يودى فى داهية قبل ما اغيب عن التدوين

    تحياتى وكل سنه وانت طيب
    ورمضان كريم

    ردحذف
  3. هو انا كل اما اشوفك الاقيك بتحب الحكومة طب اية رأيك بقى ان الحكومة مبتحبكش

    ردحذف
  4. السلام عليكم
    ايه يا عم الجامد دة كله دنا فاتنى نص عمرى انى مسمعتهاش منك
    اكيد هتبقى تحفة
    بس بجد حلوة قوى انضمت الى انا رسول ضمن افضل المصنفات
    المقطع الاول والاخير حساهم جدا
    وبتاع الحلم ابشرك 80 مليون بيشاركوك فيه
    بس احلى حاجة
    وواخد حقوقى مواطن وعاطل برتبة محاسب
    ربنا يدمها عليك نعمة
    كفاية كدا طولت عليك
    سلاااااااااام

    ردحذف
  5. فتاه من الصعيد


    واحده من الناس


    فراشة


    عاشقة القاهرة


    سارح فى ملكوته

    ( كل دول بنات عندى انا بشكر المدونة اللى خلتنى على آخر الزمن دنجوان _ سبحان الله _ )

    اشكركم جدا على تشريفكم ورأيكم بجد انتوا اصدقاء محترمين
    (عاشقة القاهرة )
    ترحيب خاص عشان الاسم اول مرة ينور المدونة

    ردحذف
  6. كل سنه وانت طيب شكرا على التهنئه

    ردحذف
  7. اكيد ولازم ان شاء الله تنزل ديوان ويبقى اسمه بحب الحكومة وتكون دى اول قصيدة فيه
    بجد والله كلمات جميلة والاحساس واصل لينا كلنا ربنا يوفقك اخى هانى يارب ويارب تتحقق احلامك

    ردحذف
  8. السلام عليكم ورحمة الله وبركاتة
    جزاك الله خيرا على كلامك دة الى بجد بيمس شباب كتير وبطريقة جميلة واسلوب رائع .. اخوك فى الله

    ردحذف
  9. السلام عليكم

    أنا لأول مرة أدخل مدونة حضرتك
    وهالكلمات بجد رائعة وخصوصا اني بحب اسلوب المصرييين في شعر العامية


    وكل عام وانتم بخير

    *من قلب غزة *

    ردحذف
  10. الله عليك
    تحفة بجد القصيدة دي

    بس استخبى اليومين دول علشان شكلهم كدة بيدوروا عليك ههههههههههه

    كل عام وانت بخير ورمضان كريم

    ردحذف
  11. عزيزي هاني
    قصيدة رائعة جداً.. وبصراحة لا أجد الكلمات للتعبير عن اعجابي بها
    فأنت استطعت بصدق شديد أن تعبر تماما عن حال المواطن المصري
    مع تحياتي وكل سنة وأنت طيب..

    ردحذف
  12. انت عارف رايي من زمان
    انا جيت بس اقولك happy ramadan

    ردحذف
  13. هانى
    كل سنه وانت طيب ويارب تكون الايام دى ايام سعد عليك
    ويارب زى السنه دى تكون محقق كل طموحاتك وتكون مصر لينا احلى من الايام دى


    مستنيه تكتب حاجه جديده انشالله تكتبها بعد السحور
    :)

    ردحذف
  14. أنت عارف يا صديقي ان انا بحب القصيدة دي و متشكر يا ريس لأن كده هيبقى عندي نسخة منها

    ردحذف
  15. السلام عليكم
    كل سنة وانت طيب ولو انك متستهلش
    قال بنات قال الله يحفظك
    بس برضه رمضان كريم

    ردحذف
  16. برافو
    بجد جميله جدا
    وفى الاخر جبت من الاخر


    كل سنه وانت طيب
    تحياتى اللاسعه

    ردحذف
  17. على الرغم من البداية الجامدة قوى اللى بداتها باول بوست ليك فى المدونة واللى لسه مخيمة على تفكيرى اول ما باجى هنا بس القصيدة دى حلوة هى كمان برضه
    كل سنة وانت طيب يا معلم ورمضان كريم وابعد عن الكمين بقى ابوس ايدك

    ردحذف
  18. اولا كل سنة وانت طيب
    تانيا عجبنى اوى اسم المدونة ده يدل على حبك الشدييييييييييد لحكومتنا المبجلة مش كده برده انا زيك تمام بعشقها عشق الكلاب للقطط واما البوست فهو اكتر من رائع سمحلى انضم لقائمة البنات يا اخ دنجوان

    ردحذف
  19. أسلوب غير في مداعبة أوداج الحكومة
    التي نسميها في المغرب: لالا الحكومة: أي سيدتي الحكومة

    سعدت بالقراءة لك من الألف إلى الياء

    مودتي

    ردحذف
  20. جميلة ياهاني
    ربنا يوفقك
    انت شاعر جميل
    وقضيتك اجمل
    بس خلي بالك من نفسك
    انا ما عرفكش

    ردحذف