الخميس، 6 أغسطس، 2009

فى بلدنا

فـ بلدنا !! ...
الليل ما بقاش زى الأول
بقي ييجي يزورنا
وبيطول
فالناس اتقلبت أوراقها
والشجرة الطالة علي الترعة
والطالة علي الأحلام جوانا
خافت واتدارت فـ ورقها
والتوت الأخضر ع الشجرة
إكمنه صغير
مش داري
ببلاوي بلدنا !!
بطل يسمع كل حكاوي الناس
للشجرة !!
فالناس زهقت
طهقت
قالت ... سمعت
فهمت !!
سكتت
عامت علي عوم أصحاب الشجرة
من غير ما تأدف
والطوب المتحدف ع التوت الأسود
ما بقاش يوصل
بقي يرجع من نص السكة
علي دماغنا
ما بقاش فينا حيل
واتدغدغنا
وتعبنا من حدف الطوب
ع التوت الأسود
المتلبد جوا الشجرة
معشش فيها
ومخليها شجرة عجوزة
رغم التوت الأخضر فيها
وإحنا بنحاول نأويها
نروّيها فنقويها
بس أصحاب الشجرة بتعند
طول العمر يزيدوا أنينها
مش عايزينها بتوتها الأخضر
لأ
عايزينها تغير دينها
إلي شجرة تفاح م الأحمر
وأما عرفنا وشوفنا
فخوفنا
سكتنا خرسنا
إتكتم النفس الطالع فينا
وإتلمينا !!
بطلنا نحدف طوب
وكرهنا التوت

وكرهنا بلدنا

هناك 30 تعليقًا:

  1. وأما عرفنا وشوفنا
    فخوفنا
    سكتنا خرسنا
    إتكتم النفس الطالع فينا
    وإتلمينا !!

    -----

    :(

    سلمت يداك :)

    ردحذف
  2. بطانا نحدف طوب
    وكرهنا التوت
    وكرهنا بلدنا
    جميله يا هانى..طبعا وكل لبيب بلاشارة يفهم..واحنا فاهمينك..بس هى كده بلدنا ..مجبرين نقبلها زى ماهى ..وحتى لو تمردناعلى اوضاعها..واضح فى النص مش بايدينا نغيرها
    سعيده جدا جدا انك رجعت تكتب تانى..والله كلماتك جميله طالعه من قلبك وبتوصل لقلبنا..متغيبش تانى

    ردحذف
  3. السلام عليكم

    تسلم ايدك يا كبير الله ينور عليك بجد
    هو ده الشعر ....؟!
    أظن هو ....
    عجبنى كتير اوى
    بس عمرى ما هان عليا حتى اقرأ كلمه كرهنا بلدنا
    يمكن انت بتشير لشىء .... او .. او
    على كلا
    انا أسعدنى كتير المرور من هنا
    مودتى :)

    ردحذف
  4. جامد يا هانى

    تعرف ممكن تألف اغانى لمحمد منير
    اصل التوت دى لاقيه عيه قوى وخصوصا انه من اجمل وارق المطربين اللى غنوا عن مصر

    تحياتى

    ردحذف
  5. احنا اصحاب الشجره موش هما ..... هما اللي عايزين ياخدوا خيرها وبعدين يرموها ....... بس هنحافظ عليها

    ولو سكتنا ..... فيا رب ما نفضلش ساكتين كتير

    كلمات رائعه ..... للامام دايما

    ردحذف
  6. لا ياعمنا

    انا عن نفسى هفضل احدف طوب

    ردحذف
  7. السلام عليكم
    القصيدة جميلةوفيها مقاطع كتير عجبتنى
    تعرف اكتر حاجة عجبانى فى المدونة دى انى بقراء فيها شعرك لانى مبسمعهوش غير كل حين ومين
    نتمنى مزيد من الابداع ومطولش الغيبة
    تحياتى
    اه ملحوظة انا لما رديت على تعليقك وقلت فلتة كان قصدى على نفسى يعنى ان البوست ده جيه منى فلتة وبس مش حاجة تانية
    تقبل مرورى

    ردحذف
  8. بيسان

    مرحبا بيكى صديقة جديدة لمدونتى
    واتمنى تكونى متابعة وشكرا لرأيك



    زهرة ربيعية

    انا كتبت القصيدة دى عشانك لما لقيتك زعلانة انى قعدت فترة مابكتبش
    وشكرا على متابعتك
    وشكرا لمدونتى انها كسبتنى صديقة عزيزة


    اقدم عاصمة فى الحب

    صديقى العزيز المتابع الجيد
    وصاحب الأراء الثاقبة دايما
    عايز اقولك انى كتبتها فى الديوان الجديد اللى هيطبع ( وعشقنا بلدنا )
    لكن النسخة دى قديمة ولما نقلتها ماحبتش اغيرها
    وهشوف رأى الناس ايه



    فراشة

    لو ينفع تكلميلى محمد منير
    انا معنديش مانع بس خليه يتصل بيا
    وانا _ عشان خاطرك _ هوافق

    وسعيد جدا بمرورك واتمنى تكونى متابعانى



    فتاه من الصعيد

    انا سعيد اولا انك شرفتى مدونتى لأول مرة
    وسعيد جدا برأيك رغم مشاكلك مع المحافظ
    لكن اتمنى تكونى متابعانى ونكون اصدقاء
    وتقبلى احترامى وتقديرى

    ردحذف
  9. حلم بيعافر

    الصديق العزيز انا بشكرك جدا على متابعتك

    واتمنى انك تعرف تنشن بالطوب كويس

    لأن احنا متعورين فى كل حاجة

    والحكاية مش ناقصة ههههههههههههههه



    سارح فى ملكوته ( عندما يعشق الانكسار)

    رأيك بيسعدنى ومتابعتك لمدونتى شرف كبير ليا

    ويارب تكونى متابعة دايما

    تقبلى احترامى وتقديرى

    ردحذف
  10. اسه ماكرهناش بلدنا
    رغم قسوتها علينا



    تحياتى اللاسعه

    ردحذف
  11. هو انا لسه مكرهتهاش بس عارف هكرهها امتى لو اللقطة بتاعة فيلم دكان شحاته دى حصلت اللى هيا بتاعة القمح دى حصلت وولادى عاشوها
    مستحملين كتير ونتحمل اكتر بس يا خوفى من اللحظة دى نفسى ما تحصلش ولو ان فى ناس بتقول هتحصل هتحصل
    ربنا يستر على ولادك يا مصر
    المهم نرجع للكلام المليان هموم بتاعك ده
    التوت الاسود مش عايز التوت الاخضر عايز يموته علشان ميبقاش توت اسود زيه
    واللى بيحدف التوت فاكر هيوصله ده بعيد قوى عن ايدينا مامن نفسه ع الاخر
    واللى عايزين يقلبوها شجرة تفاح علشان تبقى امريكانى واللا ايه علشان يعرفوا يبيعوها مثلا واللا ايه
    عموما انا مش عارفة اوصلك فهمتها ازاى بس فهمتها بيتهيئلى زى ما انت قصدك وان كان غير كده وضح لنا رغم ان حلاوة القصائد اللى من النوع ده انك تشغل مخك وتفهم انت لوحدك مش كده
    اتمنى لك التوفيق

    ردحذف
  12. مكرهتهاش
    لسه مش هكرها
    ومش مستعدة اخلى حد يخلينى اكرهها أو أ سيبهاله وأمشى

    مدونه جميله
    تحياتى لك

    ردحذف
  13. موهوب موهوب موهوب ما شاء الله
    كلامك اد ايه وجعنى...و الوجع المرة دى وجع على حال بلدنا
    لسا مكرهتهاش...و يمكن حبى ليها هو اللى مخلينى متمسكة بيها لانى لسا عندى امل تتغير على ايدينا...و لسا ناوية اعمل كل اللى اقدر عليه علشانها
    فكرتنى بجزء بحبه اوى لغنوة لمنير
    (يا مصر و انتى الحقيقة...و انتى اغترابى و شقايا....دا انتى الجراح الرهيبة...و انتى اللى عندك دوايا...علمنى حبك عبارة...سهلة و بسيطة و عفية...شرط المحبة الجسارة...شرع القلوب الوفية)

    ردحذف
  14. الله عليك يا هاني

    انتا بتقفز قفزات واسعة جدا والقصيدة فنية ماشاء الله , وحدة فنية متكاملة , اصبر عليا بس أما الصيف يخلص ونقعد نقول شعر للصبح

    ردحذف
  15. السلام عليكم ورحمه الله وبركاته
    البوست جميل بس الواحد عمره ما يكره البلد اللى اتولد وعاش فيها مهما تعمل فينا بنقول انها احسن من غيرها يمكن مش مدينا الحق قوى بس الحمدلله بردو بلدنا احسن بكتير من غيرها يمكن بكره تتعدل ونكون احلى واحلى تحياتى

    ردحذف
  16. هاني النص حلو جدا بس انا بحب اسمع الشعر وباحسه اكثر وانا باسمعه علشان كده لازم اسمعه منك الورشة الجايه ومتخافش علي التوت الاخضر عمره ما ح يكره بلده وحيقدر يدافع عنها وعن نفسه

    ردحذف
  17. و لحد أمتى يا صاحبي هنبطل نحدف طوب
    ما احنا كده ايدينا هتنشف

    ردحذف
  18. السلام عليكم

    بردلك الزيارة

    والتوت الأخضر ع الشجرة
    إكمنه صغير
    مش داري
    ببلاوي بلدنا !!
    بطل يسمع كل حكاوي الناس
    للشجرة !!
    فالناس زهقت
    طهقت
    قالت ... سمعت
    فهمت !!
    سكتت
    عامت علي عوم أصحاب الشجرة
    من غير ما تأدف
    والطوب المتحدف ع التوت الأسود
    ما بقاش يوصل
    بقي يرجع من نص السكة
    علي دماغنا
    ما بقاش فينا حيل
    واتدغدغنا
    وتعبنا من حدف الطوب
    ع التوت الأسود
    المتلبد جوا الشجرة
    معشش فيها

    قصيدة رائعة

    والتوت الاسود مفيش حاجة بتحوق فية ههههههه

    ردحذف
  19. اطمن ياهانى عمر التوت ما هيبقى تفاح
    التوت ده نعرفه قبل ما نعرف التفاح
    احنا اللى اتبطرنا عليه وبقينا ندور على حاجه تانيه طول عمرنا بنحدف شجره التوت بالطوب وهى بصدر رحب تدينا وتملا ايدينا من خيرها وتفرحنا بتوتها سواء ابيض او اسود لكن احنا استكترنا ننحنى على الارض وكسلنا نتسلق فروعنا وعايزين توتها طب ازاى؟
    تقبل تحياتى

    ردحذف
  20. فـ بلدنا !! ...
    الليل ما بقاش زى الأول
    بقي ييجي يزورنا
    وبيطول

    ------------------------

    موهبة

    وايجاز وقدرة على تكثيف الحدث والواقع


    فى كلمات معدودة


    رائعة قصائدك

    --------------------------------
    مع تحياتى / حازم ربيع

    ردحذف
  21. عزيزي هاني

    الليل والله طووول قوي قوي ومش باينله نهار
    واعتقد ان التوت إسود من زمان
    واعتقد كمان ان احنا اللي بقينا نحدف بعض بالطوب وبكل قوة وحماس

    اهنئك بشدة على القصيدة

    فهي رائعة كالعادة

    ردحذف
  22. لاسع افندى و صفاء وحياة بلا عنوان

    ولا هنكرهها وشكرا لرأيكم
    وتشريفكم ومتابعتكم لى واتمنى دايما نكون على اتصال


    مامة مازن

    انا سعيد جدا برأيك وتشريفك ومتابعتك لمدونتى
    وان شاء الله اللقطة بتاعة دكان شحاتة مش هتيجى ابدا

    دينا
    اشكرك جدا من بعض ما عندكم
    وكلامك بيحملنى جميل اتمنى اكون قده

    السيد الرئيس
    على فكرة القصيدة دى من 2003
    والصيف هيعدى زى الليل


    هند
    رأيك دايما بيسعدنى وهبقى اقولها فى الورشة لو الوقت سمح

    محمد سلامة
    لحد ما نوصل

    سماء

    انتى نورتينى

    ويارب تكونى تابعة دايما


    عطش الصبار

    انا مش هخاف او هبقى جبان
    انا هفضل اقول واكتب لغاية ما أحقق الحلم بتاعنا كلنا

    بزنس تعيش
    اهلا بيك وبرأيك الجميل
    يارب نكون متابعين دايما
    وشكرا لزيارتك

    هبة فاروق ( الصديقة )

    رأيك دايما بيفتحلى حاجات كتير
    وبيبقى مقنع ومؤثر

    شرفتينى

    ردحذف
  23. انت لسه هنا؟


    لا لا تعالى بسرعه عندنا


    تيمون وبوبما عايزينك


    كل ما تضحك اكتر كل تاكل بطاطا اكتر

    هاكونا مطاطا

    مش هتقدر تغمض عنيك

    هاكونا مطاطا هديتنا لكل المدونين عشان نخرج من حاله النكد

    هاكونا مطاطا تهييس للصبح

    هاكونا مطاطا ... لااااا للملل


    هاكونا مطاطا... قول لاء للهم

    هاكونا مطاطا.... اوعى تزعل ابدااا

    هاكونا مطاطا... ارمى الماضى ورا ضهرك


    انسى الماضى اللى يغيظ


    يلاااااااااا تعالى مستنى ايه

    وياريت تضيف اللينك عندك
    ومش هتندم ابدآ

    مودتى

    ردحذف
  24. برنس
    فينك ياباشا
    ايه الجديد معاك
    عايزه منك جديد بسرعه
    وبتسال على مدونتى القديمه مانت لو بتدخل كنت عرفت اللى جرا
    يالا ده موضوع انتهى وراح لحاله
    ادينى جيت بنيو لوك
    مش كده يمشى اكتر
    يالا عايزه جديد
    سمعنى

    ردحذف
  25. السلام عليكم
    مهما عملت بلدى مقدرش اكرها
    ادايق اه ازعل اه لكن اكره لاء
    دمت فى سعاده

    ردحذف
  26. انا عجبنى البداية اوى يا هانى
    شد حيلك

    ردحذف
  27. شكرا لكل الاراء

    وكل الزيارات

    واتمنى نكون دايما موفقين معا

    ردحذف
  28. فعلا تعبنا واتدغدنا..ومن كتر اللى عرفناه وسمعناه -رغم انه يادوبك فتات من اللى بيحصل- لكن معدناش قادرين نعرف ولا نسمع اكتر من كده..
    كانت مصر..كانت حاجة جميلة ورعشة لذيذة بين الضلوع بتفرحنا وتضحكنا..كانت ود ..كانت دفا.. كانت لمة وصحبة..كانت عشرة وأمنية ..
    بقت ايه؟؟ بقت ..وجـــــــــــــع..آه يابلدى..
    القصيدة فيها شجن جميل خاصة فى اول جملتين..اممممم اعتقد ان القصيدة ركزت قوى على فكرةالخوف
    فى تناولها لمعنى او موضوع الوطن...


    "فالناس زهقت
    طهقت
    قالت ... سمعت
    فهمت !!
    سكتت
    عامت علي عوم أصحاب الشجرة
    من غير ما تأدف"...حقيقى قوووى الإحساس ده..!!
    تمنياتى بالتوفيق.

    ردحذف
  29. السلام عليكم ورحمة الله وبركاتة
    جزاك الله خيراااااا
    لاتحرمنا من زيارتك وكل من تحب
    (مدونة رسول الله )

    ردحذف
  30. ان شاء الله بدأت لمسابقة على مدونتى بااسم يلا نعرف الصحابى
    المطلوب
    ان انت تجاوب على السوال
    واضافة كل ما تعرف على الصحابى
    http://shbabmoslm.blogspot.com/
    ان شاء الله تضع الاجابة فى التعليقات

    ردحذف