الخميس، 23 يوليو، 2009

مازلت على العهد يا خالد

صديقى الراحل / خالد عبدالعزيز

مر على فراقك حتى الآن أكثر من عام لكنى مازلت احفظ كلماتك ونصائحك وأتغذى بأفكارك وأحلم نفس الحلم الذى رسمته لى

أنا الآن تقريبا أمارس الشعر فقط وتركت المسرح تقريبا واسعى لأكون الشاعر الذى حلمت

أنا عايز اقولك انك وحشنى جدا جدا ومفتقدك ومحتاج رأيك فى حاجات كتير مش عارف اتصرف فيها ازاى وعايز اقولك انك بتكون معايا

فى كل حتة فيها شعر او ادب فى كل لقاء او مناقشة اصحابى الجداد دايما لما يلاقونى سرحان بيفتكروا ان فى مشاكل عندى صحيح انا

انا عندى مشاكل فى البيت اكتر من الاول لكن فراقك بالنسبة ليا مشكلتى الاكبر انا مش عارف اتأقلم من غيرك دايما اى مشكلة بتواجهنى

بستنى اتصالك عشان اروحلك البيت ونقعد فى مكتبك اللى لسة بيتعمل ونتكلم فى المشكلة والحل وياخدنا الكلام لكل حاجة فى الدنيا ونختار

الوان الحيطان بتاعة المكتب ونعرف هنعمل ايه فى لقاء الخميس اللى الجاى ونتصل بالناس اللى هنستضيفهم ونناقش اعمالنا وشغلنا

ولما اقولك ان النهاردة خدت شهادة تقدير من الجامعة عن دورى فى المسرحية الجديدة تبعت تجيب حاجة ساقعة ونحتفل وتقولى بس الشعر

محتاجك يا هانى اوعى تنساه ونتفق نروح مهرجان العامية بتاع حلمية الزيتون ونروح وما حدش يقول مننا غيرى عشان بتخانق مع

المنظمين بتوع المهرجان عشان بيطلعوا الناس اللى يعرفوهم بس واحنا مروحين فى المترو نضحك ونعمل ندوة فى المترو ونسمع كل الناس

غصب عنهم ونحلف اننا مش هنروح المهرجان ده تانى ونقاطع الناس بتوع الحلمية وقبل المهرجان ما يبدأ بشهر نقعد نحضرله

عايز اقولك ان الساقية اللى فتحت جديد عملوا حاجة اسمها تقريبا مكان للكتابة ولازم نروح نشوف الناس دى ونقول هناك صحيح المكان

فى ناس غريبة ودايما بينقدوا وخلاص لكن مقاطعتنا مش حلوة المكان ده هيبقى مهم بعد كدة انا بقيت من الناس اللى دايما فى الساقية وبقيت

اقول كتير وما بقتش اروح يوم الخميس زى كل اسبوع بقى فيه مشاكل كتيرة قوى والناس هناك بيتخانقوا على مين يدير مكانك وعرضوا

عليا ادير لكن انا ما أقدرش اقعد مكانك وفى ناس شايفة انها احق منى بكتير على العموم انا ومحمد الملوانى لما كنا عندك فى آخر يوم فى

المستشفى قبل العملية قررنا ان مهما حصل ليك ان احنا لازم نحافظ على المكان ده لكن احنا آسفين جدا مش قادرين كل حاجة اتغيرت بعدك

يا خالد ولازم تعرف انك معايا فى كل وقت وعايز اقولك ان فى حاجات كتير اتغيرت فى السنة دى وانا هستناك تتصل بيا عشان اقولهالك

او اجيلك فى البيت احسن عشان آخد منك الورق اللى انت كتبته على الديوان بتاعى ( فى الجامعة ) واعرف رأيك فى الديوان الجديد اللى انا

خلصته وسميته ( بحب الحكومة ) عارف يا خالد أنا لسة محتفظ برقمك وما فكرتش امسحه رغم انى غيرت العدة وجبت عدة بكاميرا زى

ما كنت بحلم ما انت عارف احلامى كلها بسيطة وعبيطة وعلى قدى المهم انا جاى اقولك كمان انى عملت مدونة ونشرت قصيدة فيها

افكارى عن الشعر وعن كتابتى وناس كتير علقوا وكانت عجباهم جدا ولسة مش عارف اكتب ايه بعد كده سألت ناس أصحابى ليهم مدونات

بس ما حدش إدانى عقاد نافع فقولت اقولك وآخد رأيك بفكر أرجع للمسرح تانى وخايف أسيب الشعر تزعل منى لكن الجوايز والتقديرات اللى

أخدتها فى المسرح دايما بتكلمنى وتقولى لازم ترجع وعايزك تعرف ان فى ناس من اللى علمتهم مسرح بقوا مخرجين وبياخدوا جوايز

وبيشتركوا فى اكبر المهرجانات فى البلد ودايما بيعزمونى أو بيطلبوا منى أساعدهم فى حاجة ودايما أروح وأغلب الوقت بيكونوا عايزنى

أصمم وأنفذ الإضاءة ما انت عارف انى مميز فى الموضوع ده وانا بحب الموضوع ده انما فى الشعر انا لسة ما عملتش حاجة اصلا

فى ناس كتير لسة ما يعرفونيش وناس ما بتحبش الكتابة اللى انا بكتبها ودايما فى المسابقات ما بكسبش ما انت عارف ان الناس اللى بيكتبوا

بالطريقة الجديدة اللى احنا ما بنحبهاش بيأثروا لأن الطريقة دى فى القراية بتشد الواحد والصور بتكون واضحة ومأثرة انما الطريقة بتاعتى

لما تتقرى على ورق بتفقد نص جمالها وعايز اقولك ان فى ناس اصحابى بيزنوا عليا عشان اعملهم مسرح وحاولت لكن مواعيدهم وعدم

التزامهم تقريبا بيلغى الفكرة لكن والله غصب عنى قولتلهم انى بتاع مسرح او مش فاكر مين اللى فتح الموضوع وعايز اقولك انى اتعرضت

لموقف وحش قوى من واحدة اسمها (.....) كان عيد ميلادها ورحت جبت لها هدية ورفضتها وماكنتش عارف اعمل ايه لكن الموضوع عدى

وخلاص وكمان انى اتخانقت مع ابويا كالعادة لكن انت عارف انى قلبى اسود وما بنساش حاجة مهما كانت صغيرة المهم ان فى خبر

هيفرحك ان ديوانك اللى قعد 6 سنين فى الثقافة أخيرا طلع بعد ما إتدخلت ناس فى الموضوع وإن فى ناس راحوا اشتروا كل النسخ الموجودة

وقالوا انهم هيوزعوها علينا وانا لسة ما أخدتش نسخة ورحت الهيئة عشان اشترى نسخ مالقتش اى كتاب لكن اول ما هيجينى هبقى أقولك

رأيى مع انك عارف رأيى فى شغلك وعايز اقولك ان فى خلاف بينى وبين مدام عزة مديرة بيت الثقافة عشان كدة ما بروحش يوم

الخميس رغم انى والله مش غلطان الحكاية ان الناس بتوع المسرح فى امبابة عايزين يكتبوا اسمى فى البنفلت رغم انى مش شغال اصلا فى

العرض وكمان عايزين يحطونى مساعد مخرج فكل اللى انا قولته ساعتها انى مش موافق وان ده لو حصل انا هعمل مشكلة ومن ساعتها

عرفت انها زعلانة منى فقررت انى اقاطع المكان

أسيبك بقى دلوقت وهبقى أحكيلك مرة تانية سلام


إدعوا معايا ::




اللهك ارحمه
واغفرله
واسكنه فسيح جناتك

يارب العالمين







آمين

هناك 24 تعليقًا:

  1. انا فتحت التعليق
    عشان اختى قالتلى لازم تفتح التعليق
    طالما نشرت ود هدف المدونة

    ردحذف
  2. اولا اللهم ارحم صديقك خالد ويجعل مثواه الجنة يارب - ثانيا أشكرك على زيارة مدونتى -
    ثالثا - أشتغل مسرح وأكتب شعر أعمل الاتنين ومايهمكش من الى يقول شغلك مش عاجبه لان ده شىء طبيعى - وماتسألش حد عن ايه الى تكتبه فى مدونتك لا أكتب الى أنت حاسس به وعايز تكتبه زى الرسالة الجميلة لصديقك الراحل كلها أحساس وشجن نابع من القلب - ونصيحة أم مايبقاش قلبك أسود وأكيد أنت قلبك مش أسود الخناقات بتعدى بس أنت عاديها وربنا يخليك له ويخلى أبوك لك - ولما ينزل ديوان المرحوم خالد قولى علشان اشتريه وكذلك ديوانك متعك الله بالصحة والعافية وربنا يبعد عنك كل هم وحزن وكدر - وأسفة أنى طولت عليك بس همسة أخيرة الحياة تستمر ولازم تستمر -

    ردحذف
  3. الأخ الفاضل :: بحب الحكومة ::

    اللهم ارحمه
    وارض عنه
    وأرضه يا رب


    ــــــــــــــــــــ
    دمت وفيًّا

    ردحذف
  4. اخى الاستاذ هانى
    الله يرحم صديقك ويعينك على فراقه يارب انا مقدرةجدا احساسك وشعورك فقد فقدت عزيز على قلبى وكان رفيقى طيلة 5 سنوات وصديقى ومستشارى وابى انه حماى الغالى مازلت ابكيه فقد كان بالنسبة لى نعم الناس ونعم الاخلاق ونعم الاصول ونعم الدين ونعم الابوة ونعم الحنان وووووووو
    اى حاجة ممكن تكون مش حاسسها دلوقتى بين الناس كانت فيه كان بمثابة اب ثانى لى ممكن تقرا موضوعى عنه
    رجل من اغلى الرجال هو على مدونتى كتبته بصدق مشاعر ومن قلبى فعلا زى كلام حضرتك هنا
    الصداقة الطيبة دى مبقتش موجودةولو لقيناها بتروح برضه ربنا يرحمه ويجعل مثواه الجنة ويجمعك بيه فى جنته يارب
    وصحيح اكتب اللى انت حاسه ممكن تحس ساعات انك مش عارف تكتب ايه او عندك كذا حاجة عايز تقولها وساعات تحس ان دماغك فاضى عادى بتصل ههههههه خد وقتك بس انسان عنده كم الابداع اللى انا قراته فى اول قصيدة ده صعب جدا ميبقاش عنده حاجة يقولها
    دمت اخى بخير وربنا يخلي والديك يارب

    ردحذف
  5. أثرت دموعي بشدة...ممكن اقول ايه؟؟؟حسيت الكلام اللى حضرتك قولته قوووى، وتلمست شكل علاقتكم، ومتفهمة جدااااا افتقادك ليه، ومدى الوجع اللى بيحدثه غيابه خصوصا لما تبقى محتاجة هو بسسسس..عارفة.. عارفة جداااعارفة ان مفيش حد ينفع ياخد مكانه..عمري ماهقول لحضرتك "الحياة مبتقفش عند شخص معين.."لأنى عارفة وموقنة انها حتى اذا مرت هتمر من غير طعم ولا اهمية،هتمر وهى بتسحب روحنا منا وبتسحب احلى الحاجات جوانا..عارفة كويس يعنى ايه اننا نفتقد مذاقناالشخصي اللى كنا بنحسه مع ناس بالقرب ده مننا.. كنا بنحب نفسنا معاهم..كنا بنشوف نفسنا وآرائنا فى نظرة عيونهم وتعابير وشهم لما نحكيلهم عن اللى جوانا وتاعبنا..وحتى اذا ماحلولناش المشكلة اللى بنحكيلهم عنها، مجرد اننا نحس انهم فاهمين ومقدرين كنا بنحس ان حمل تقيل اتزاح من على قلوبنا...
    بس انا مش هينفع اقول كل ده واسكت، لازم اقول لحضرتك كمان، ان صداقة زى دى عمرها ماتتنسى، بس ده قدر..متستغرقش في الوجع واستمر في الحاجات اللى بتلاقى نفسك فيها مبدع وجميل..الحاجات اللى بتحققلك ذاتك، وده اكيد هيسعد خالد كمان قد ماهيسعدك.تمنياتي بكل الخير.

    ردحذف
  6. ربنا يرحمه ويغفرله يا رب

    اول ما لفت نظري تدوينه وفاء لصديق قديم ..... ثم اقرأت قصيده عاميه لموهبه رائعه ......وبما اني من هواه الشعر ..... هكون ضيفه باستمرار
    تقبل مروري

    ردحذف
  7. صديقي هاني
    اعتقد انه ليس هناك اي تعارض بين المسرح والشعر ويمكن الاثنين يكملوا بعض اوعي تتخلي عن اي منهم واكيد ساعتها خالد ح يكون مبسوط علشانك
    عارفة اد ايه الواحد بيفتقد صديقه اللي مالهوش غيره واللي كان معاه طول الوقت اوعي تسمع كلام حد يقولك المسرح الاول ولا الشعر الاول لا الاثنين مغ بعض وانت قدها وقدود ومستنيين مسرحية قريب مع ديوان وربنا يرحم خالد ونسبرك علي بعده

    ردحذف
  8. انا و الله ما عارفة اعلق اقول ايه
    مفيش فى الدنيا احلى من صديق يفهمك و تفهمه و تكبر احلامكم مع بعض و تتعلقوا بكل تفاصيل بعض للدرجة دى زى ما مفيش اصعب من انك تفقده
    بجد ربنا يرحمه و احيى فيك وفائك دا لصاحبك
    ربنا يرحمه يا رب و يسكنه فسيح جناته

    ردحذف
  9. محمد سعد القويري

    مامة مازن

    moony

    فتاه من الصعيد

    nudy

    dina

    انا بشكركم جدا على متابعتى وأرائكم

    وبشكر الناس اللى شرفونى لأول مرة

    واتمنى نكون اصدقاء ومتابعين مع بعض دايما


    تقبلوا فائق الاحترام

    ردحذف
  10. هانى هانى هانى هانى هانى
    احفظ سرنا الصغير
    وسورى ع التاخير

    ردحذف
  11. ربنا يرحمه ويرضى عنه
    وربنا يصبرك على فراقه
    لقد أثرت في هذه التدوينة جداً ببساطتها وصدقها
    وأتمنى لك التوفيق في عملك

    ردحذف
  12. الهم اغفر له وارحمه واعف عنةاكرم نزله ووسع مدخله واغسله بالماء والثلج والبرد ونقه من الخطايا كما ينقي الثوب الابيض من الدنس وابدله دارا خيرا من داره واهلا خيره من اهله وزوجه خيرا من زوجه وادخله الجنه واعذه من عذاب النار ومن عذاب القبر

    اللهم امين

    أخي العزيز هاني تأثرت كثيراً برسالتك فكم هو صعب أن تفقد صديق كان لك السند وأحييك علي الوفاء لصديقك رحمة الله عليه , وأنا معجب بثقتك وأقتناعك بنفسك وبأعمالك وبإذن الله موفق , أما عن المشاكل بينك وبين والدك فأنا أخذت عنك إنطباع بأنك شاب متدين وملتزم -وإبن بلد كمان - ولا تحتاج مثلي أن يذكرك بحقوق الوالدين فحاول حل هذة المشاكل بشىء من الهدوء والحكمة وبعيداً عن العصبية والتوتر.

    أتمني لك كل التوفيق والنجاح

    تقبل مروري

    ردحذف
  13. عارف..اناكنت قريتها اول ما اتنشرت ولما جيت اعلق لقيت التعليقات مقفولة

    للأسف الدهشة الاولي راحت, مش فاكر انا كنت هقول لك ايه وقتها
    بس اكيد انتا فاهم

    ردحذف
  14. تعيش و تفتكر يا صديقي و ربنا يرحم أمواتنا جميعاً و محدش عارف المستقبل مخبي ايه بكرة
    على فكرة انا عرفت السر الخطير اللي بينك و بين إنسانه هبقى اقولك بعدين
    أه نسيت اقولك , أبقى سلملي على عزة
    نياااااااااااهههههههههه

    ردحذف
  15. يرحم الله أمواتنا أجمعين

    ..

    لكنه ترك بداخلك حلم و فكرة فلتكملهم يا صديقي

    دمت بمودة

    ردحذف
  16. انا كنت دخلت اول ما انت كتبت المدونة لكنك كنت شايل التعليقات..

    من اصعب المواقف في الحياة فراق الاحبة،
    ربي يرحم صديقك خالد ويرضى عنه ، و يرحم موتانا جميعا،

    مثل ما قال احد المعلقين ، اشتغل مسرح و اكتب شعر الاثنين ، موش لازم يكون واحد على حساب الثاني،
    على هوى ما شفنا من القصيدة السابقة فانت فنان و الفنان يكون مبدع مهما كان الميدان..
    لاحق احلامك كلها ما تتنازلش على اي واحد مهما كان..

    تحياتي ..

    اه ايه.. رسمت رسمة جديدة يا ريت تنورني في المدونة و تعطيني رايك

    ردحذف
  17. * كتبت المدونة ، لكن قصدت التدوينة :)

    ردحذف
  18. اممم

    قلبت عليه المواجع :(

    ذكرتني بشخصيه تحمل نفس الاسم

    وتحمل معزه كبيره فقلبي

    فقدتها من حوالي سنتين!

    بس احس انها لحد اليوم عايشه معاي:(

    الله يرحم موتانا وموتى المسلمين يا رب

    ويحسن عاقبتنا!

    ردحذف
  19. مساء الخير يا افندم

    أولاً أحب أقولك اني حبيت خالد
    آه والله حبيته من كلامك عنه وأحب أقولك ان البني آدم اللي بسيب التأثير ده ف اللي حواليه مستحيل يموت....
    واضح انه كان بيحب الناس من قلبه
    محدش هيقولك خد بالك سكتك الحقيقية هنال إلا إذا كان بيحبك فعلاً

    تعرف انا ف لحظة حسيت انه أبوك أو أخوك الكبير
    انت متكلمتش عنه كتير بس رسمته كوبس أوي
    كنت هقولك ربنا بخليكم لبعض وبعدين افتكرت ان خالد مشي....بس انا متأكدة انه فخور بيك
    طول ما انت ماشي باتجاه نفسك

    حاجة كمان
    لمست قلبي وانت بتقول أختي قالتلبي افتح التعليقات
    بشرفني ياهاني اني أكون أختك فعلاً

    ....

    ردحذف
  20. انسانة


    هبة فاروق

    هيثم رمضان

    اشكركم جدا جدا على تشريفكم

    واتمنى نكون اصدقاء دائما

    منتظركم

    ردحذف
  21. السيد الرئيس

    محمد سلامة

    انتوا نورتوا يا بهوات والله


    اسماء على

    مرحبا بيكى انتى شرفتينى
    واتمنى نكون اصدقاء دائما


    اقصوصة

    انا خلاص اعتبرتك صديقة مهمة فى المدونة دى اتمنى ما تكسفينيش



    حنان

    انا بجد بيسعدنى رأيك ووجودك فى مدونتى
    وكونك صديقة عزيزة
    وكنت منتظر رأيك على البوست ده
    وهنتظره كل بوست

    ردحذف
  22. غادة
    غادة
    غادة
    غادة

    انا عايز ازغرط والله عشان تشريفك مدونتى المتواضعة

    انا هنتظرك دايما تنورينى

    وعايز اقولك بجد يا غادة انا بعتبرك اختى _ معلش _الكبيرة ( خليها عليكى بقى )


    نورتى يا فندم

    ردحذف
  23. السلام عليكم
    كلامك مؤثر مش عارفة ليه
    ربنا يرحم صاحبك وكل اموات المسلمين
    انا حاسة ان انت بدخل نفسك فالحيرة
    بارادتك
    او انت عاوز تفضل كده في مود معين وخلاص

    ردحذف
  24. اولا السلام عليكم ورحمة الله وبركاتة

    ورمضان كريم عليك وعلى الامة الاسلامية والله يرحمة صديقك بس عجبنى قوى ان فى حد لسة بيحب الحب دة لصديقة فى الله الله يرحمة وانت لازم تكمل وتفتكرة طبعا وان شاء الله ربنا هيصبرك على فراقة ويكرمك وكلامك بجد حلو وانت بتحكى لحد مات بس صديق عمرك ويديلك طولة العمر يارب فى طاعة الله ويهدينا ويهديك اللهم امين يارب العالمين
    تقبل مرورى
    heba

    ردحذف