السبت، 4 يوليو، 2009

انا رسول

قطع قصايدك
و انحنى قدام قصايدى
و افتخر انى أعرفك
و اعترف
ان الكتابة للوطن مش شئ بسيط
و ان الوطن محتاج قصايدى
زى ما قصايد جنابك عايزة شاعر
مش راح أكتب
عن ليالى الشوق ف موسكو القايدة نار
أو نهار بروميثيوس المصلوب قدر
أو أخالف نص فى القرءان
عشان يقولوا فيه جديد
كل يوم ف بلدنا تلقى فيه جديد
فى التحايل ع القوانين و اللوايح
فيه جديد
فى الهروب م المسئولية
فيه جديد
فى الوسايط و التعامل بالرشاوى
فيه جديد
حتى فى طريقة الاهانة وف المزلة
فيه جديد
ايه يفيد اكتب عن النبض اللى ساكن جوا أشلاء المشاعر
منحنى لنظرة عيون الحلم مشتاق للربيع
و أنا كل يوم بعمل خناقة عشان مواصلة
و أنحنى للسواقين
و أبتسم عشان أمضى بدرى
ايه يضيع منى .. كرامتى ؟!
شئ مش ضرورى ف الوطن ده عشان أعيش
ما يهمنيش طول المسافة المبهمة
بين الحدود لللأوليا و الأنبيا
أو فن تجريد المعانى
أو رسوم للمملكة فوق الجدار المرتجف خوف و انفعال
ما يهمنيش شعر العيال
ما يهمنيش غير المسافة المدركة
بين وقفتى ف آخر الطابور و الفرن
بين الكتابة للوطن و العمر
بين انكسار الحلم فينا و الكلام ع التنمية
بين الحياه الخضرا اللى فى عيونهم وبينا
بين قصايدى وبين كتاب المدرسة
بينى و بينك و الوطن
بين الحياه و بين الكفن
القصيدة ثورة حرة
بتنطلق لجل انقلاب ف الفكر
و أنا صاحب الثورة
و أقدر اكتب عن تضاد الظن فى نسيج الملامح
و انعزال الأوردة ف جسمى النحيف
و انكسار الموج ف قلب الدوامات
و ارتباط الانعدام بالتجربة
و الآهات المبهمة
المتمكنة ف نحت التجاعيد الخفية ف قلب شرايين الفرح
أو فن تفسير الرؤى ف ظل ارتحال (يوسف)

* * *
( إنى آنست نارآ )
( فادخلوا مساكنكم ) عشان ما حطمكوش
أنا خلصت ارتحال ف الشعر
و انفطر الحنين و اليأس
و جئتك من امبابة بنبإ يقين
سندوتش الفول بقى بجنيه و نص
اكتب ايه ؟!!
أرفض الوحى اللى جايلى
و اختلف عن مبدئى
و اكتب قصيدة مزيفة عنى
و عن وطن انكسر فيه الآدان للفجر
مشنوق ف القصايد غصب عنه
و انكتب
لكنه لسه ما اكتملش
ما انهزمش _ انا مش هبطل شعر _
أنا هفضل اكتب ع الوطن
ما يهمنيش مين استوى ع العرش

* * *
أنا كنت ما بقفش الطابور ف المدرسة
علشان ما حييش العلم زى العيال و خلاص
و عشان كدة واضح ما بينا الاختلاف
كان العلم بيحبنى لوحدى
اما انت من ضمن العيال خواف
غصب عنك ترتجف ترفع ايديك
و عنيك تلف على الاساتذة
عمرك ما بصيت للعلم
و عشان كدة عمرك ما حسيت بالوطن
فياريت تكفر عن قصايدك
تنحنى قدام قصايدى
تفتخر انك عارفنى
تعترف
ان الكتابة للوطن مش شئ بسيط
و ان الوطن محتاج قصايدى
زى ما قصايد جنابك عايزة شاعر

هناك 56 تعليقًا:

  1. الله عليك يا هاني
    بجد بجد تحفة , أنا سمعتها منك قبل كدا وحضرت يحيي وهوا بيقراها
    موهوب والله يابني
    أنا أول واحد يعلق عندك يا هاني
    خليك فاكرها :)

    ردحذف
  2. السلام عليكم

    شكلها اول تدونية
    مبروك المدونة ..

    فعلا الكتابة للوطن شيء موش بسيط

    محتاجين من اللي يكتب عنه يكون حد حاسس بيه.. و بينا..

    قصيدة هاااايلة جداااا

    تحياتي..

    ردحذف
  3. يا ريت و لو ممكن
    و لو ما فيهاش ثقالة ،
    تحذف خيار تدقيق الكلمات
    جنني على ما قبل مني التعليق
    و انا النظر على قده ..

    ردحذف
  4. انا جاوبت عندي في المدونة ..

    ردحذف
  5. إحساسك عالي أوووي



    استمـــــر :))

    ردحذف
  6. إيه يا راجل انت ده
    إيه اللي انت عامله ده
    أخيراً يا صديقي بقيت مدون . كده بقى من حقك تقعد معانا .
    قصيدة جميلة جداً يا صديقي و انت طبعاً عارف رأيي .
    مبروك المدونة و عقبال أي حاجة حلوة

    ردحذف
  7. الف مبروك يا عم الكتكوت على المدونة اولاً وعلى القصيدة ثانياً وطبعاً انا عارف انك ها تصدعنا مدونات وحكاوى عن المدونات وربنا يستر من الجاى

    ردحذف
  8. حنان
    انا سعيد جدا بوجودك وحرصك على التعليق وان شاء الله نستمر معا الى الافضل


    زوام
    انا هعقدكوا مدونات اصبر بس لغاية ما أجيب كمبيوتر
    دا انتوا هتتقطعوا



    محمد سلامه

    الله يخليك دا أقل حاجة عندى
    وبعد ما عملت مدونة اسمحلى انى ما أعرفكوش الوداع يا سلامة (قال تستحق تقعد معانا )
    اتكلم على قدك ياد


    تسنيم



    اهلا بيك وامنى تشرفنى دايما




    السيد الرئيس

    انت دخلت التاريخ من اوسع ابوابه
    لانك كنت صاحب اول تعليق ( انتظر السحب )
    اللى هيعلق اكتر هنشر له قصيدة من ابداعه عندى
    وشوف انت بقى ...الشهرة والمجد و..و..و...
    نورتنى يا ريس (احنا مالناش الا بعض

    ردحذف
  9. ماشاء الله عجبتنى القصيدة جدا ربنا يوفقك
    من زمان مسمعتش شعر للوطن بكل الصدق والحزن والحب ده بجد
    اول تدوينة لحضرتك وعقبال التدوينة الالف والاهم من ده كله عقبال ما تلم القصايد اللى واضح جدا انها اكيد كتير فى كتاب ونضمه لمجموعتنا فى بيوتنا
    شكرا لانك مخلص لبلدك عارف اللى فيها وعايشه لكن لسه حبها باقى جوه القلب وده الاهم
    شكر لحضرتك مرة تانية على القصيدة

    ردحذف
  10. مامة مازن

    شكرا جدا جدا على تعليقك واتمنى انى اكون عند حسن ظنك وان شاء الله هحوش واعمل ديوان وأول نسخة تكون عند سيادتك
    واشكرك على تقديرك واتمنى تكونى ضيفة دائمة عليا

    ردحذف
  11. السلام عليكم ,,,

    ألف ألف مبروك على المدونه يا جميل
    وبشكرك على المتعه اللى انا عشتها مع القصيده بتاعتك الاكثر من رائعه.
    هو ده الشعر يا عم مش الشعر اللى انا بقوله....
    انا على قدى يعنى بعبر عن موقف وخلاص انما انت راجل محترف ..
    عموما يا رب تكون المدونه وشها حلو عليك وتكون فاتحه خير لصداقات محترمه تقدر انك تثق فيها وتحبهم ويحبوك.....
    .
    .
    تقبلنى زائر دائم لهذا الصرح العظيم
    .
    .
    كن كما تحب

    ردحذف
  12. السلام عليكم
    حلو الاسم بتاع باحب الحكومة
    بجد ضحكت اول ما قريته
    متزعلش
    انا باضحك
    يا عم فكها شوية ههههههههه
    بس بجد كلامك عن الوطن ممتاز
    الوطن ميحسش به قوووى الى اللى بيبعد عنه
    وانا دلوقتى بعيد عنه
    ونفسي ارجع له فوررررررررررررا

    تقبل تحياتى اخى الاصغر

    ردحذف
  13. أهلا وسهلا بيك فى عالم التدوين
    بداية موفقة جداااااااااااااا
    ربنا يكرمك
    كلماتك روعة بجد

    ردحذف
  14. شكلك لسه مبتدا فى التدوين زى
    موضوع جميل
    (اتمنى تشرفنا فى المدونه المتواضعه)

    ردحذف
  15. اقدم عاصمة

    الله يبارك فيك وانا منتظرك دائما وسعيد جدا بصداقتك



    ذو الوجه المبتسم


    انا عمرى ما أزعل منك كفاية اسمك
    وبعدين انت براحتك اعتبر المدونة دى متنفس ليك قول رأيك براحتك
    كفاية الغربة
    انا منتظرك دائما

    ردحذف
  16. جحا المصرى

    اشكرك جدا واتمنى تكون صديق لى هنتظر تعليقك دايما




    سيف


    اهلا بيك
    خليك معانا بقى احنا مالناش الا بعض

    ردحذف
  17. مبروك يا عم هانى
    بداية موفقة
    و مرحبا بك فى عالم المدونات الممل

    ردحذف
  18. حلوه اوى...:)

    ماشاء الله ..كمل كده ..هو صحيح انت بتحب الحكومه؟:)

    سندس

    ردحذف
  19. بجد انا مصدومة

    ثورة رهيبة ياهاني

    ملك في العامية والله ولغتك قوية

    ردحذف
  20. الف مبروك على المدونه
    بدايه قويه وقصيده جميله
    فى انتظار الجديد
    وشكرا على زيارتك وفعلا الكتابه عن الطن صعبه جدا
    سؤال مين اللى موجه له الرساله وعايز فصايده تنحنى قدام قصايدك
    شاعر احنا نعرفه ولا ده كلام مجازى
    وكويس واللهى ان فيه حد بيحب الحكومه
    ويارب الحكومه تحبنا
    تقبل تحياتى

    ردحذف
  21. الأخ الفاضل هانى
    السلام عليكم ورحمة الله وبركاته
    أشكر مرورك الطيب ويشرفنى زيارتى الأولى لمدونتك
    وأهنئك بمناسبة إطلاق مدونتك وعجبنى جداً طريقة طرحك لبعض من المشاكل التى نعانى منها فى أوطاننا
    تقبل تقديرى وإحترامى

    ردحذف
  22. ياشاعر يا متمكن
    انا بنحنى قدام قصيدتك
    تقبل انحنائتى

    ردحذف
  23. حلوة القصيدة تصلح كبداية قوية
    ننتظر منك المزيد
    تقبل تحياتي و مروري

    ردحذف
  24. حسام فاروق

    عالم التدوينات سينتعش بمجرد دخولى

    اتمنى اشوف تعليقك على القصيدة

    ردحذف
  25. سندس وامل

    شكرا على تقديرك ليا

    انا فعلا بحب ال....

    عشان بتدينا اجازات رسمية كتيرة

    ردحذف
  26. من اجل عنيك


    الله يخليكى
    انا مش عايز ابقى ملك عشان ما حدش يدعى عليا

    اشكرك جدا جدا
    اتمنى نكون اصدقاء

    منتظرك دائما

    ردحذف
  27. عطش الصبار

    شكرا ليك جدا

    فعلا هوه شاعر نعرفه ومجاز




    شموع

    اشكرك واتمنى تزورينى دايما





    حلم بيعافر

    تقبل انت انحنائى وتقديرى لزيارتك الكريمة
    انت بوجودك بتجبرنى على التقدير والاحترام
    وشكرا ليك

    ردحذف
  28. صباحك سكر

    الف مبروك على المدونة و ان شاء الله تكون علامة مضيئة فى عالم التدوين

    عجبنى اوى اسمك بس ياترى انت بتحب البلد ولا بتحب الحكومة اصلها هتفرق برده يا استاذ هانى

    بلدنا مش وحشة واحنا محتاجين نحبها بس المشكلة فى مجموعة افراد بتتعامل بناء على مصالح شخصية ليها وناسية ان الوطن والشعب له حق عليها

    عامة كلامك حلو اوى و احساسه عالى
    نورت عالم التدوين
    فى انتظار جديدك
    تحياتى
    يويو

    ردحذف
  29. واحد مجنونة

    الله يخليكى وشكرا ليكى
    وانا ايضا فى انتظار زياراتك

    ردحذف
  30. YOYO


    اشكرك جدا على رأيك
    اسمى على اسم قصيدة عندى اسمها (بحب الحكومة )

    وان شاء الله تكون البوست التانى

    بالنسبة لحب البلد
    انا بحب البلد اكتر من نفسى (مسألة دينية و زكرياتية )

    _ حلوة زكرياتية دى _


    بالنسبة لحب الحكومة
    انا لازم احبها طبعا _ هوه فى حد ما بيحبش الحكومة _

    خليكى عاقلة يا يويو

    شكرا لمرورك

    منتظرك دايما

    ردحذف
  31. لا جامد

    وبعدين حب الحكومة من حب الوطن .... ولا إيه

    و اللي ميحبش الوطن يبقى من الصف الخامس

    ردحذف
  32. حلو قوي يا باشا
    بجد
    لغتك مختلفة ومميزه
    تسلم ايدك

    ردحذف
  33. السلامه عليكم

    مبروك المدونه

    وان شاء الله تنور بكتابتاك الاروع

    ربنا يوفق وبجد القصيده جامده
    احيك عليها

    انوسه

    ردحذف
  34. اولا السلام عليكم

    ثانيا مبروك المدونة

    ثالثا القصيدة رائعة وان كانت قصايده مش كلها عايزة تتقطع يعنى فى فلتات كويسة

    رابعا فعلا الكتابة للوطن مس شى بسيط

    ختاما اتمنى مزيدمن الابداع فى القريب العاجل

    سلام

    ردحذف
  35. ابن الاخوان والازهر

    ابو العريف

    عاشقة الاحزان

    سارح فى ملكوته

    اشكركم جدا جدا

    واتمنى تدوم الصداقة بينا


    تقديرى واحترامى ليكم

    ردحذف
  36. أزال المؤلف هذا التعليق.

    ردحذف
  37. السلام عليكم ورحمة الله وبركاتة

    انا أول ززيارة ليا عندك بس واضح انك عاملها جديدة بس مبروك عليك وكلامك عن الوطن واسلوبك واختيار كلماتك حلو بتعبر كويس تحياتى ليك بجد

    فعلا الوطن دة حاجة جميلة بس يمكن كتير مابقوش بيحبو الكلمة من اللى بيحصل بس مايعرفوش انها احسن من غيرها وماحدش بيعرف قيمتها او قيمة الكلمة غير اللى يجرب البعد عنها تقبل مرورى


    تحياتى ليك


    heba

    ردحذف
  38. قصيدة رائعة ومتميزة
    ارجو التواصل انا لدى مدونتين واحدة للقصة القصيرة والتانية للمقالات بحلم ببكرة ياريت الزيارة
    ولدى اقتراح اخر ليةما نعمل ندوة او ورشة ادبية على النت من خلال اختيار عمل ادبى سواء قصة او قصيدة اسبوعيا ويتم التعليق علية لا اقول نقد ولكن انطباع
    ارجو الرد واالافادة وكمان زيارة المدونتين وعد
    ربنا معاك

    ردحذف
  39. بوست جمييييل وأصيل قوى,
    الفكرة لايقة قوى على الأيام اللى بنعيشها..حالة حسيتها أنا كمان

    السياق والتعبير: عجبنى قوى المقطع ده:"ما يهمنيش غير المسافة المدركة
    بين وقفتى ف آخر الطابور و الفرن
    بين الكتابة للوطن و العمر
    بين انكسار الحلم فينا و الكلام ع التنمية
    بين الحياه الخضرا اللى فى عيونهم وبينا
    بين قصايدى وبين كتاب المدرسة
    بينى و بينك و الوطن
    بين الحياه و بين الكفن"رائع بجد.

    بس اسمحلى فى أجزاء كانت مبهمة شوية بالنسبة ليا..أكترهم كان ده"

    و أقدر اكتب عن تضاد الظن فى نسيج الملامح
    و انعزال الأوردة ف جسمى النحيف
    و انكسار الموج ف قلب الدوامات
    و ارتباط الانعدام بالتجربة
    و الآهات المبهمة
    المتمكنة ف نحت التجاعيد الخفية ف قلب شرايين الفرح
    أو فن تفسير الرؤى ف ظل انحراف (يوسف)
    ( إنى آنست نارآ )
    ( فادخلوا مساكنكم ) عشان ما حطمكوش
    أنا خلصت ارتحال ف الشعر
    و انفطر الحنين و اليأس":$:$:$:$
    8-(8-(
    فكرةمعبرة قوى وقصيدة جميلة..أتمنى أن أقرا لحضرتك بوست تاني قريب..تمنياتي بالتوفيق.

    ردحذف
  40. جميله جدا

    وواقعيه

    تحسها مش بس تقرأها

    سعيدة انى زورتك
    تحياتى لك

    ردحذف
  41. مين اللى ينحنى يا ابنى انت نسيت ولا ايه ده انا ايمان عبدالنبى عارف لو مدخلتش المدونه وقريتها
    هقتلك وانا بدعو كل الاصدقاء انهم يزوروا المدونه بتاعتى ويفيدونى بارائهم

    http://emanpoet.ektob.com/

    ردحذف
  42. انحنى امام قصائدك احتراما واعجابا

    تحياتى

    ردحذف
  43. السلام عليكم
    كلام جميل وواقعي
    واقع مر مر مر
    بس لسى فيه حته حلوة
    هي اننا نرفض الذل

    ردحذف
  44. الله
    ما شاء الله عليك...الكلام كله احساس و صدق و يعبر عن موهبة ظاغية ما شاء الله

    ردحذف
  45. جامدة جدا يا هاني وفيها حاجات جديدة عن كتاباتك القديمة , والاهم من كدة مبلاوك المدونة يا معلم

    ردحذف
  46. قصيدة هايلة جدا..بصراحة جت على الجرح قوي احييك بشدة عليها وألف مبروك على المدونة واتمنى لك كل توفيق..

    ردحذف
  47. حقيقي والله العظيم وبدون مجاملة

    منذ فترة كبيرة لم ارى شاعر مكتمل البنيان الشعرى

    فى المدونين

    مثلك

    لديك القدرة على الامساك بالتفعيلة واستدعاء الصور

    كفلاش الكاميرا

    وهذة من اهم سمات شعراء الحداثة

    بالاضافة الى العمق الثقافى والخلفية الحضارية

    العالية التى تمتلكها

    تستدعى برومثيوس من الاسطورة اليونانية

    وتستدعى الحكمة والايات القرانية

    وتسدعى الانحاء للسواق من الحارة المصرية

    كم كنت رائع

    ------------------------------------
    ولكن كنت افضل الا تطول القصيدة الى هذة الدرجة فنحن فى عصر التكثيف الشعرى
    -------------------------------------------
    مع تحياتى / حازم ربيع

    ردحذف
  48. انت مش ناوى تطل علينا بحاجة جديدة ولا ايه
    كفاية تقل بقى يا عم
    تقبل مرورى
    ورد الزيارة

    ردحذف
  49. heba

    عمادخلاف

    moony

    صفــــــاء

    لاسع افندى


    إيمان عبد النبى

    سمسم
    dina

    Heba Faruq
    بزنس تعيش


    اشكركم جدا جدا على تعليقاتكم

    واتمنى زيارتكم دايما

    ردحذف
  50. بما انى المعلقه رقم خمسين اعتقد من حقى اكون مميزه..اولا اصفق اعجابا ببراعتك فى الكلمات التلقائيه اللى خلتنى اقفف مبهوره قصاد كلامك..ثانيا ..كلامك وجعنى..خالد ده كانك حكيت المنا كلنا..شكلته وحسستنا بيه..انا عندى من الالم ما يكفى..بس المك كان اوجع..انا جيت المدونه صدفه..لكن اكيد هزورها تانى متعمده..هاجى واسمعك بتحكى قصيدة حلمنا..انا المعلقه رقم خمسين يسعدنى تشرف مدونتى..يمكن المها يناسب جزء من المك..
    وفعلا انت رائع..وجدير بان القبك..فنى كلمات متالمه

    ردحذف
  51. واضح ان مافيش تعليق علي انا مازلت باقي علي العهد ياخالد كنت اعلق علي مشاعرك الجميله دي ياهاني وعلي اخلاصك لصاحبك الله أول مره احس انك بتتكلم بجد
    الله يرحمك ياأستاذ خالد .

    ردحذف
  52. من ناحيه تانيه عايزه اهزقك بس ماينفعس في الرسالة اللي قبله
    يابني مش هاتبطل قلة الاصل دي الناس كلهم زاروني وانت لا
    ماشي يا هاني مردودالك .

    ردحذف
  53. انا بشكركم جدا جدا على تعليقاتكم

    وان شاء الله ابقى عند حسن ظنكم دايما

    شكرا ليكم
    واتمنى متابعتكم دايما

    ردحذف
  54. الله عليك يا هاني

    مش معقول ..انت مدهش ..قصيدة رائعة جدا .

    ردحذف
  55. اكتب ايه ؟!!
    أرفض الوحى اللى جايلى
    و اختلف عن مبدئى
    و اكتب قصيدة مزيفة عنى
    و عن وطن انكسر

    علشان يقولوا اني متفائلة وايجابية و .....و .....

    اشكرك على الزيارة
    سمراء

    ردحذف
  56. لماذا لاتكتب لنا شيئا جديدا؟كلما دخلت الى المدونه اكون بانتظار التصادم مع ابداع اخر من ابداعاتك ليفاجئنى الصمت الذى عم المدونه بعد رحيل خالد ونص انى رسول
    هل لك ان تكتب مجددا ..فنحن بانتظارك

    ردحذف