السبت، 4 يناير، 2014

فك شفرات إعلان أبلة فاهيتا بالكامل (التأويل بإعتباره نص أدبى ساخر )

هااااااام : إقرأ للآخر وماتزهقش ثم شاهد الإعلان مرة أخرى
........................

عايز أقول فى البداية إنى ماكنتش عارف إيه حوار فاهيتا ده وإيه موضوع الإعلان
وبعدين كتبت على الفيس يا جدعان حد يفهمنى الموضوع : فحد قالى دا اعلان لفودافون ..فدخلت كتبت على اليوتيوب وقعدت أبحث لقيت كذا حاجة

المهم :
صلوا ع النبى .. أنا كان نفسى أكتب مقالات ساخرة إسبوعية فى أهم جورنال مصرى وآخد 60000 جنيه شهريا
ههههههههههههههه
المهم بجد نتكلم على الإعلان :
فى البداية ككاتب مسرحى عجبنى الحوار وتفاصيل الشخصية وإستخدام الصوت ليا عليه ملاحظات لكن على العموم أنا فكرت إنى أكتبه وأعيد تمثيله تانى مع نفسى كنوع من أنواع التسخين
مالكوش دعوة بالحاجات دى .. تعالوا ندخل على الحوار بسرعة جدا جدا ونشوف التأويل على الواقع المصرى فيما تمر به من أحداث .
الحوار وتأويله :
الصوت فى الخلفية بيقول :  لكل المصريين صدور الرومى أو صدور الديك الرومى المحشية للكريسماس
التأويل : صدر الرومى يعنى العربيات لإستخدامها
صدور الديك الرومى المحشية للكريسماس يعنى العربيات المفخخة اللى ممكن نستخدمها وتم إستخدامها قبل كدة
الصوت : وكمان كيكة الكريسماس
التأويل : المظاهرات والمسيرات
.........
فاهيتا : ألو .. أيوة مين ؟ بطة ؟
التأويل لشخصية بطة :  هى المنظمة العالمية للإخوان
فاهيتا : ها فكيتى ؟؟ قلتلك يا بطة فريزر .. بيقولوا الساقعة دى ما إتشافتش من أيام الدليسيبس .. ماما توتو ؟ .. قم سنانها إتجمد فى الكوباية ولسة مستنيينه يفك .. لا مش هتفهمى منها حاجة خالص
التأويل : فكيتى أى هناك شئ مجمد لها .. طقم سنانها والمقصود بها أرصدة الجمعيات التابعة للإخوان لأنها تم تجميد نشاطها وأرصدتها .. الكباية يعنى البنوك
مستنيينه يفك يعنى يبقى مش عليه حراسة
مش هتفهمى منها حاجة خالص .. لا يمكن إستخدام هذه الأموال فى العمليات
ماما توتو هى الإسم الحركى للإخوان فى مصر
الساقعة دى ما إتشافتش من أيام الدليسيبس هسيبكم تبحثوا تاريخيا عن وضع جماعة الإخوان وما كانوا يريدونه أيام ديليسيبس بخصوص قناة السويس عشان تتفاجئوا وماكنش بحثت لوحدى وتقرا الملاحظة وتاخد المعلومة على الجاهز :)
الحوار : ها يا كركورة لقتيها ؟
تأويل شخصية كركورة يعنى جميع عملائها على الأرض (منظمات / أحزاب / حركات / إإتلافات ... إلخ )
الحوار : فتشتى البالطو البيج ؟ فتقتى بطانته ؟ طب عضعضتى ياقته ؟
التأويل : البالطو البيج هو الجيش المصرى والتفتيش هو المصادمات معاه
فتأتى بطانته يعنى أنهكتى قواه أو حاولتى تعملى خلافات داخلية فيه
عضعضتى ياقته يعنى الإحتكاك بقياداته والياقة المصود بيها السيسى ولو كانت جمع (ياقات يبقى المجلس العسكرى )
الحوار : طب يالا روحى دورى إنتى فى رف البيبلوهات وإلبسى حاجة فى رجلك .. أيوة يا بطة .. دى كركورة بتبرطم على شريحة المرحوم مش لقياها .. شريحته من قبل ما يبقى مرحوم
التأويل : رف البيبلوهات مكان لم أفك شفرته
شريحة المرحوم يعنى فلاشة أو شريحة عليها أسرار عليا تخص مصر
المرحوم يعنى المعزول مرسى
الحوار : إيه ؟ الشيخ الألوس .. كلمته .. قلتله يبعت للمرحوم يطلعلى
التأويل : الشيخ الألوس هو عميل قريب من مرسى ويتحدث معه ويتم المراسلة من خلاله
الحوار  : على طول جانى فى المنام تانى يوم
التأويل  : بعت رساله بطريقة أخرى
الحوار : عرقان ومهبط وبيقولى إنتوا بردانين كدة ليه ؟
التأويل : زعلان .. بردانين يعنى موقفين النشاط
الحوار  : دا الجو صهد نار
التأويل  : الدنيا خربانه عنده ومش هادية
الحوار  : لا شدوه قبل ما يقولى دافس الشريحة فين
التأويل  : دخلوا عليه وهو بيراسلهم
الحوار  : لا المرحوم طول عمره حريص .. يخلوهولى طول عمره حريص
التأويل  : لم يتم إكتشاف وسيلة الإتصال ومرسى حريص جدا
الحوار  : لا بردك بعت سيكيورتى البواب ندهلى الكلب اللى فى جراج المول اللى جنبينا .. ريكس بوليسى
التأويل : لا موقفناش بحث .. سيكيورتى البواب عميل آخر فى منظمة أخرى كلمة بواب وجنبينا بتعنى إنه على الحدود المصرية
ريكس بوليسى يعنى فرد مدرب تدريب عالى ويأتى عن طريق هذه المنظمة الجارة
الحوار  : بييجى يشمشم ويطلعلك الضايع وياخد نسبة
التأويل  : ييجى يأدى المهمة مقابل نسبة معينة مهما كانت صعوبتها
الحوار  : الحرس مش الكلب
التأويل  : النسبة للمنظمة وليس التعامل مع الفرد
الحوار  : جه شمشملى فى كل حتة وبردك مالقهاشى
التأويل  : دخل مصر وبحث عن ال(الشئ ) ولم يجدها
الحوار  : بس طلعلى فردة صندل كانت ضايعة
التأويل  : حاجة تانى ممكن نستخدمها
تأتى كركورة وتمسك بشئ وتقول :
كركورة : هى دى الشريحة ؟؟
فاهيتا : يهدك ؟ مش دى الشريحة .. فتشتى فى لكلوكه الاسمر ؟؟
التأويل : لكلوكه الاسمر يعنى الشرطة .. فتشتى يعنى مصادمات
وتم إستخدام نفس اللفظ مع البالطو البيج ( الجيش )
الحوار  : ومحفظته ..... طب شوفى كدة يكون مخبيها فى ياقة طقم الدراكولا
التأويل : محفظته مش قدرت أفك شفرتها
ياقة طقم الدراكولا يعنى وزارة الدفاع (مقر السيسى دراكولا عندهم )
الحوار : روحى .. يالا إتلهوجى
التأويل : روحى نفذى
......................................................................

كان فيه نص مسرحى شغال فى إعداده إسمه ( الكاتب فى شهر العسل ) للمؤلف : على سالم الذى تم منع كتبه لتطبيعه مع إسرائيل زمان .. إنما دلوقت كتبه متاحة
النص بيتكلم عن المخابرات بشكل عام وأحدث الأجهزة فيها .. ياريت تقروه
إيه علاقته بالكلام اللى أنا كاتبه ؟؟
فى آخر العرض هنكتشف إن المجنون هو العاقل الوحيد
............
وفيه مسرحية إسمها ( المساعيد ) للمؤلف : درويش الأسيوطى هتلاقوها على النت تم نشرها فى جريدة مسرحنا
المسرحية دى بتحكى عن إختراع نماذج شبيهة بالبشر وسماها المخترع مسعود 1 ومسعود2 ومسعود 3 .. وهكذا (المساعيد ) .. وبينتشروا فى البلد ويسيطروا على البلدة بالكامل و ... إقروها أفضل

.......................
ملحوظة :
عشان لو مش فيه وظيفة كاتب مقال ساخر ب 60000 ألف ممكن أشتغل مفكر فى المخابرات بنفس المبلغ هههههههههههههههه
ملحوظة هامة جدا : التأويل من روح المبدع أحمد اسبايدر ههههههههههه
تشبعت بأفكاره وتقمصت شخصيته وخدت يدوب كام مفتاح للتأويل وإنطلقت :)
ههههههههههههههههه
ههههههههههههههههههههههههههههههههههههههههه
ههههههههههههه

الثلاثاء، 15 يناير، 2013

أنبياء الجنوب

يا أيها النبى :
( آخر حدود الخوف وطن
فارد جناحه لإنتزاع قلبك وفكرك م المواجع

راح يلم اللى انكسر فى حلم جامع )
النبى قام ف الطريق

بعتر الأحلام إزاز
كان كل خطوة يإن قلبه
فإنكسر
فكر يكون عصفور طليق

لقى المدينة بدون سما
ضل الطريق إلى أى عش
فإرتمى فى البوح
نزف من مسام الحلم أفكاره
وإنفجر السؤال :
يا هل ترى كان وحى ولا كابوس
فإستقبل المعجزة
(سبحان اللى أسرى به من قلب الجنوب لوسط البلد)
هنا المدينة ترد أحلام النبى فى عين الفراغ
لا قادرة توصل للسما
ولا تنزرع فى الأرض
لسة المحاولة بتستمر لدق الساقية فى الأسفلت


***

يا أيها النبى :

( كاذبة كل الكتب
(سيزيف هنا يحمل على أكتافه القصعة)

هنا بيكرموا السامرى للإختلاف
هنا نبى فى جزء محذوف من حكايته
إشتغل فى جريدة صفرا ديسك مان




***
يا أيها النبى :
( الروح مجموعة م الأحلام
فخلى بالك وانت بتعدى الطريق م الصيادين
عيون الناس شبك والطعم مش معروف )


الكلام جوا النبى كان ليه صدى
خلى المجاز شئ واقعى
لم الطريق فى عنيه وصل
كوتشه المقطع كان سبب للراحة ع القهوة
كان فى نبى سبقه :

: ياصاحبى .. الشاى هنا ب 2 جنيه
لم اللى باقى من إحترامنا فى عيون القهوجى
والأرصفة مأوى
 أهون من الحوجة أو طلة الشفقة
***
قام النبى المدبوح

نزف القصايد أسئلة
 والإجابة معجزات

فإنفرد بالوحى
عرفوا المدّعين
وإتجمعوا متعبّيين بالغل

قالوا إطرحوه أرضا ..  قالوا إقتلوه
( وما قتلوه ولكن شبهَ لهم )

يا مدعين  :
النبوة قدر.. والسر فى الفطرة
الخضر مش م الأنبيا  رغم إمتلاكه المعرفة وفراسة التأويل


تحليل منطقى يثبت
بإن الوحى بيزور الجميع
والسر فى الإيمان
وكان الله فى عون المؤمنين بالوطن
وعون المؤمنين بالشعر

***

يا أيها النبى :
ردد معى ( رب إنى قد مسنى الضر )
قام النبى ردد : ( رب إنى قد مسنى الضر )
كانت رغرغة عينه بتشهد ضعف حالته
عكس كل الأنبيا
رغم إمتلاكه لمعجزات
أفنى عمره
وماتمش رسالته

31/8/2012

الأربعاء، 2 نوفمبر، 2011

البنت


تقريبا مخلوق من وسط الضى ونهر ماحدش شافه ، ممكن م الجنة وممكن من بين الأحلام ، البنت حياة لعصفور طاير وبيحضن كل الألوان فى عيونه ، تقريبا البنت ملاك حَب يجرب عيشة الانسان ماعرفش يكون بنى آدم من لحم ودم ، تقريبا كدة مخلوقة من حلم ونور ، مش عارف ليه عين البنت براح ، هتشوف فيها الشمس وقت مايبلعها البحر وتشوف فيها شعاع الشمس وهوة بيرمى ملامحه على شجرة فسفور ، وتشوف فيها ذكرى لكل تجارب حوا ، وتشوف فيها تفاصيلك وكأنك شفاف على كشكول واضح كل الرسومات منه ، وتشوف العطر وهوة بيِرْسَى على كفوف الورد ، وتشوف فيها مليون لون واضحين جدا ولا يقدر ينطق منها لسانك لون ويصدقه عقلك ، وبيتهيألى كمان انها تقدر بعنيها تودى مراكب آخر الأرض ، ولولا حكمت ربك إن الأرض بتدور كان مافضلش مراكب فى البحر ، وتقدر ترسم بعنيها مصاير ناس وبتنفخ روح على روحهم لو حبت ، تقدر برده لو حبت .. تعمل واصلة نور للقمر الساكن فى عيون الحبيبة وتفك عقوده مع الشمس وتبقى مصدر نوره ، وكمان تقدر من غير مجهود تلغى السحر والتعاويذ والأفكار اللى بتتولد جواك وتضيف براحتها أغنية لفيروز وتقدر من رمش عنيها لما تحركه فى هدوء تعمل مزيكا زى بتاعة اغنية حب ايه ،وكمان فى عنيها ... وكمان ...وتقدر ...وتقدر ...وتقدر

أنا


أنا قمة الدهشة اللى فى عيون الملايكة لما رفض إبليس السجود وقمة الدهشة برده فى عيون الشيطان لما أمر ربنا يسجدوا لآدم

أنا قمة أى شئ وكل شئ أنا الإزاز المكسر فى ميكروباص بايظ واصل مابين الدهشة والواقع أنا شنطة العيل اللى فيها ساندوتشاته أنا وقت الفسحة لعيل مخنوق م الدراسة وجرس المروح للمدرس المخنوق من التعليم وبيدور على الوقت لدروس تانية أنا حلم لسة بيتولد وحلم مولود واتفطم وحلم لسة متخرج من الجامعة وبيدور على حلمه أنا سلسلة مفاتيح فى بنلطلون واحد بيدفع قسط عربية وبيجيب نص كيلو لبن عشان يوفر للإيجار أنا صفارة الإنذار انا عربية الإسعاف اللى بتخبط وتزعج كل الشوراع وفاضية من جوا وأنا الإضاءة فى غرفة العملية لطفل لسة بيحبى قبل الموت ونعش راجل عجوز جدا مكروه من ولاده وأنا الإبن الكبير برده وأنا الإبن الصغير وأنا الجار اللى بتحسّر على الدنيا وبنزل للعزا عشان مايقلوش عيبة وأنا اللى بصلى الفجر حاضر وبدور على مزة بعد الظهر وأنا الكرسى اللى فاضى فى آخر العربية وكل اللى بيشوفه بيمشى وأنا الصدفة اللى بين اتنين كانوا زملا فى الجامعة وأنا الجامعة وقت امتحان المحاسبة وأنا الكيبوورد وقت الدردشة وأنا سطوح الجيران وقت مانطير طياراتنا وأنا لعبة الدومينو فى رحلة لشرم وقطر الليل فى رحلة الشتا لأسوان وأنا صورة على الحيطة فى دوشة الإعلان عن الترشيح وأنا الكشكول اللى فاضى ورماه الواد اللى ساب المدرسة عشان يشتغل تبّاع على عربية فى الوراق وانا دبوس فى طرحة بنت أصلا مش بتتحجب وأنا تليفون فى وقت الإمتحان فى ايد الواد اللى بيراجع وعايز يعرف حل المسألة من حد ناجح قبل منه فى المادة أنا الطبلة فى فرح وكل ما تنضرب يتبسط كل المعزومين أنا طبق الفول فى عز الصبح على طبلية العيلة اللى مالهاش عدْ انا تدوينة عن ثورة فى عز الضرب وأنا الضرب تحت الحزام فى بطولة ملاكمة فى نهائى بطولة الجامعة ويلعب فيها كل اللى مش فى الجامعة أصلا أنا الطابور اللى مابيخلصش ولا بعرف بيبدأ امتى من أصله ولا أعرف مين اللى فيه مظلوم أنا الوحيد اللى مظلوم فى التعامل أنا الصليب فى عيون المسلمين وأنا المصحف فى عيون النصارى وأنا المصحف والصليب فى قلب مظاهرة بتطالب بنور إضافى من عيون الشمس وأنا قوضة وصالة فى حضن القمر بإيجار جديدأنا ...أنا...أنا ...

السبت، 12 فبراير، 2011

انتصرنا .. انتصرنا ( ثورة 25 يناير ) .. شوية حاجات



انها ثورة حقيقية التى قمنا جميعا بها لم نكن نطلب المستحيل وكانت مطالبنا مشروعة وكنا رغم اختلافنا دينيا وفكريا وسياسيا وغير سياسيا ظللنا نهتف هتاف واحد من يوم 25 يناير الى نهاية الثورة وكان هذا الهتاف هو ( الشعب يريد اسقاط النظام ) هذا الهتاف الذى تجمعنا عليه من يوم 25 يناير وحتى 11 فبراير وهو تاريخ تنحى رئيس الجمهورية عن السلطة .
اننا الان احرار وكسرنا قيد النظام القديم الذى كانت أخطائه وخطاياه وتجاوزاته تفوق الحد والان ننتظر عهد جديد حديث للحرية والديموقراطية الحقيقية التى كنا نسمه عنها فقط ولا نراها .

( قولوا ثورة وماتقولوش حركة )

( نصف الثورة تكون مقبرة للشعب )
انه الشعار والفكر الذى تجمعنا حوله لم نكن نستطيع العودة للوراء بعد يوم 25 يناير لانها كانت ستصبح كارثة بكل المقاييس لهذا الشعب من خرج للثورة أو لم يخرج .

تم وقوع ظلم بين علينا نحن الشباب وتم اتهامنا بتخريب البلد ووقف الحال وضياع البلد واننا ننتمى الى اجندات اجنبية واننا عملاء واننا نأخذ مالا لنهتف واننا مأجورين وان نصفنا اجانب واننا إخوان ( جماعة محظورة فى عهد النظام الساقط ) وتحملنا الكثير من المضايقات من بلطجية النظام السابق ومن بعض افراد الشعب المضلل اعلاميا .
الا اننا تحملنا كل ذلك من اجل هذه البلد وحبا فيها وحبا فى ان نعيش حياة كريمة دون اهدار للكرامة او تعدى على حقوقنا .

الان نسمع ونرى كل من كانوا ضد الثورة من الشعب وقد نزلوا الى الشوارع بأعلام مصر فرحين بالانتصار وبنجاح ثورتنا وكأنهم لم يكونوا يهاجمونا قبل قرار التنحى للرئيس مبارك بثوانى .

انا لم اكن ولن اكون ضمن اى حزب سياسى ولكنى سأكون دائما مدافعا عن الحق وعن رأيى وملتزما بكل ماهو يضمن للوطن حياة افضل .

( الاعلام المصرى اكبر متآمر على هذا الوطن )
ثبت لنا ان الاعلام المصرى الذى كان أحد أهم الجبهات فى النظام القديم انه كان ملكا للنظام ينفذ به مخططاته التى يريد ان يزرعها فى عقول الشعب الغير قادر على متابعة اى قناة خارجية وخدع هذا الشعب فى حقيقة الامور .. ان هذا الاعلام يجي ان يحاكم كل القائمين عليه من وزير اعلام الى مذيعين قاموا بهذه الحملة التى تم كشفها فى النهاية بنجاح الثورة .

من 25 يناير الى 11 فبراير مدة الثورة حدث العديد من الامور والكثير من الكلام والافعال لم يكن يتحملها اى وطن لكن لكون مصر هى اعظم دول العالم شعبا فقد صبر وتحمل واستمر الشعب فى ثورته فى كل محافظات مصر

سوف نرى العديد والعديد من الافكار والحكايا والتأريخات لهذه الثورة ليعرف العالم والقادمين فى العهود القادمة ماذا حدث فى اهم ثورة فى تاريخ مصر منذ 7000 سنة

سوف احكى واكتب ما حدث تباعا فى هذه الثورة ولكن حكايات ذاتية وعامة فى المرات القادمة
اللهم وفقنى فى سرد هذه الحكايات

شكرا للجيش المصرى والقوات المسلحة فى كل افعالهم فى هذه الثورة

انتظرونى بإذن الله محايدا الى ابعد الحدود كما كنت دائما



الجمعة، 21 يناير، 2011

ديوان بحب الحكومة فى معرض الكتاب القادم بإذن الله فى دار اكتب للنشر



مين اللى قال ان الوطن خواف
الوطن حابب يكون تحت اللحاف
البرد معروف للجميع والكل بردان
اشمعنى يعنى الوطن عايزينه يستهوى
ناس بنت كلب ياجدع
غاوية صداع
ملحوظة :الكلام مالوش علاقة بالديوان انا حبيت انشر الاتنين مع بعض لانى مش بتابع ومش عارف هدخل امتى تانى

السبت، 10 يوليو، 2010

الوليد


والله ماسبتش مكانى يوم أُحد
ومازلت واقف منتظر
رغم إنى محتاج للغنايم
لكن حلاوة الإنتظار
بتهد جوايا إشتياقى للوصول
الرسول كان له أكيد حكمة فى ثباتنا
إثبتوا

***

_ الإلتزام سر الوصول بالمعركة لبر الأمان
الغنايم مصيدة
الإنتصار مش بالسهولة المفرطة
الإنتصار بتْدَعَّمه أبسط مبادئ
إيه لزمة التخطيط .. إذا كان إلتزامنا بالقواعد والأوامر إتنسى ؟؟ _

***

أنا ملتزم
وانحرافى عن مبادئى مستحيل
أنا مش هكون زى اللى نزلوا للميدان من غير سلاح
فاتحين صدورهم لاغتيال الريح من غير حساب الممكنات

***

فكروا قبل التحرك ..
هل من الممكن لجيش
أرسى قواعد الانكسار
والرهبة والخوف والعذاب جوا قلوبنا
إنه يسمح إنِّنا نملك زمام المعركة
والسيطرة ف قلب الميدان
من غير مقاومة أو مؤامرة أو معارضة
أو مخطط للحصار لاستعادة مجدهم ؟؟
إنهم لا يؤمنون
والحرب خدعة وكل شئ فيها مباح


***


والوليد مش سهل أبدا
الوليد عارف ظروفنا واحتياجنا
وانحرافه عن حالاتنا واعتقادنا
يدَعَّمه لاقتناص آخر فتات حلم المواجهه من قلوبنا
تتنزف منَّا الإرادة
ننكشف ليهم
فنستقبل سهام الفكر من جوفهم نبقى ف تشتت
هى دى لحظة وصول حلم الوليد للسما
يلتقى بخوفنا المعشش فى العيون
نستقبل المطر التحكم
يتولد فينا انكسارنا وبين ملامحنا الذهول
تنطق قلوبنا
ياريتنا طاوعنا الرسول

***

_ إيه راح يفيد الندم من بعد تحديد المصير
إيه راح يفيد المؤمنين دلوقت
بإسلام الوليد بعدين
إيه راح يفيد الإبتكار لحظة وقوع المشكلة
إذا كان إيمانَّا بدورنا أصبح منتهى
والإعتماد ع الغير أصبح وسيلة للخلاص _

***

الوليد رش الجنود ع الميدان
فى الحلم / جوا الكيان / فى الدم
إنكسر فينا التحرر
وارتمينا ف حضن أخطائنا وطمعنا
إتجردت أفكارنا من درع المصابرة والإيمان بالإنتصار
الوليد رش الجنود فى الميدان دوامات
إتخلقنا من موج المفاجأة
وانكسار الموج فى قلب الدوامات هى حقيقة الموت
إحنا اتخلقنا لمعركة واحنا مش عارفين
جلل سؤالى فى الفضا إزاى بقينا مؤمنين

_ أنا مش هفارق موقعى إلا بموتى _

ياللى عندك أمل إن الوليد يرحم شقانا وضعفنا
لازم تفوق
الوليد مش هيبقى ف صفنا أبدا
مش هيؤمن باللى فى قلوبنا
الوليد هيموت كدة
كافر